ಕಾವ್ಯ ಸಂಗಾತಿ
ಶುಭಲಕ್ಷ್ಮಿ ಆರ್ ನಾಯಕ
ಮಳೆಯು ಬಾರದೆ..
ಚಾತಕ ಹಕ್ಕಿಯ ತೆರದಲಿ ಕಾದಿದೆ
ಧರೆಯುತಂಪಿನ ಹನಿಗಾಗಿ
ಹಗುರದ ಗಾಳಿಗೆ ಸರಿದಿದೆ ಮೋಡವು
ಮಳೆಯನು ನೀಡದೆ ಇಳೆಗಾಗಿ //೧//
ಮರಗಳು ಇಲ್ಲದೆ ಗಿಡಗಳು ಇಲ್ಲದೆ
ದಾಹವ ತೀರಿಸೆ ನೀರಿಲ್ಲ
ಕೆರೆಗಳು ಬತ್ತಿ ಕೊಳಗಳು ಒಣಗಿ
ಭೂಮಿಯ ತಾಪವು ಬಿಟ್ಟಿಲ್ಲ//೨//
ಬೆವರಿನ ಹನಿಗಳೇ ಮಳೆಯ ರೂಪದಲಿ
ಮೈಯಲಿ ಬಿಸಿಯ ಚೆಲ್ಲಿಹವು
ತಾಪಕೆ ನಲುಗಿದ ಜಲಚರ ಜೀವಿಗಳು
ಜಲವಿರದೆ ನಾಶ ಹೊಂದಿಹವು//೩//
ತರುಗಳ ಕಡಿದು ನಾಶವ ಮಾಡಿದ
ಪಾಪವು ಬದುಕನು ಸುಡುತಿಹುದು
ದುಡ್ಡಿನ ಆಸೆಗೆ ಪರಿಸರ ಕೆಡಿಸಿ
ಕಂಬನಿ ಧಾರೆ ಹರಿದಿಹುದು//೪//
ಪಾಳು ಬಿದ್ದಿದೆ ಭೂಮಿಯು ಎಲ್ಲೆಡೆ
ಹಸಿರನು ಬೆಳಸುವ ಮನಸಿರದೆ
ಮಣ್ಣಿನ ಮೋಹವು ಕಡಿಮೆ ಆಗಲು
ಕಾಂಕ್ರೀಟು ನೆಲದಲಿ ಕಾಣುತಿದೆ//೫//
ಬಾರದೆ ಮಳೆಯು ಇಳೆಯಿದು ಬೆಂಗಾಡು
ಮಸಣದ ಛಾಯೆ ಬಂದಿಹುದೆ?
ಕಾರಿದೆ ಉರಿಯಲಿ ಬೆಂಕಿಯ ಜ್ವಾಲೆಯು
ದಾವಾನಲವಾಗಿ ಸುಡಬಹುದೆ?//೬//
ಶುಭಲಕ್ಷ್ಮಿ ಆರ್ ನಾಯಕ
About The Author
