ಕಾವ್ಯ ಸಂಗಾತಿ

ಡಾ ಅನ್ನಪೂರ್ಣಾ ಹಿರೇಮಠ

ನಿನ್ನ ನೆನಪ ತುಂಬೈತಿ

ನಟ್ಟಿರುಳಿನಾಗ ನಿನ್ನ ನೆನಪು ಬರತೈತಿ
ಬಿಟ್ಟಿರಲೆಂಗ ಹೇಳೊ ನನ್ನ ಗೆಳೆಯಾ
ಹೊಂಗನಿಸಿನ್ಯಾಗ ನಿನ್ನ ರೂಪ ತುಂಬೈತಿ
ಮರೆತೆಂಗ ಬದುಕಲಿ ಹೇಳೋ ಗೆಳೆಯಾ//

ಕಣ್ಮುಚ್ಚಿದರೂ ಕಣ್ತೆರೆದರೂ ನಿನ್ನ ರೂಪ ಕುಂತೈತಿ
ನಾಲಿಗೆ ತುದಿಯಾಗ ನಿನ್ನ ಹೆಸರ ಕುಣಿತೈತಿ
ಎದೆ ಬಡಿತದಾಗ ಜೊತೆಯಾಗಿ ಮಿಡಿತೈತಿ
ನನ್ನುಸಿರಿನೊಳಗ ಹಾಡಾಗಿ ಬೆರೆತೊಂದಾಗೈತಿ//

ಕುಂತರೂ ನಿಂತರೂ ತಳಮಳ ಶುರುವಾಗೈತಿ
ನನ್ನ ದೇಹವಿದು ತಂಬೂರಿಯಾಗಿ ನಿಂತೈತಿ
ನುಡಿಯೋ ತಂತಿಗಳೆಲ್ಲ ಬಿಗಿಯಾಗಿ ಹೋಗೈತಿ
ಸರಿಗಮ ನುಡಿಸೋ ಬಂದು ಗೆಳೆಯಾ ಎಂದೈತಿ//

ಭಾವದಲೆಯಾಗ ಪ್ರೀತಿ ತೊರೆಯಾಗಿ ಹರಿದೈತಿ
ಮನ ಬಯಸಿ ಬಯಸಿ ಬೆಂಗಾಡ ಹೊಕ್ಕೈತಿ
ಅಗಲಿಕೆಯ ಅರೆಗಳಿಗೆ ಸಹಿಸದೇ ಸೊರಗೈತಿ
ವಿರಹದುರಿಗೆ ಸುಟ್ಟು ಸುಟ್ಟು ಕರಕಲಾಗೈತಿ//

ನೀ ಬರತಿ ಅಂತ ಕಾದು ಕಂಗಾಲಾಗೈತಿ
ವಿರಹದ ಪ್ರವಾಹ ನನ್ನ ಕೊಚ್ಚಿ ಕೊಲ್ಲಾತೈತಿ
ಜೀವವಿಂದು ಸೊರಗಿ ಸೊರಗಿ ಸುಣ್ಣವಾಗೈತಿ
ಗೆಳೆಯಾ ನೀ ಬಂದು ಅಪ್ಪಿ ಮುದ್ದಾಡೋ ಅನ್ನತೈತಿ

ಡಾ ಅನ್ನಪೂರ್ಣಾ ಹಿರೇಮಠ

About The Author

admin

See author's posts