ವಾಣಿ ಯಡಹಳ್ಳಿಮಠ-ಕವಿಯನು ಬರೀ ,, - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ವಾಣಿ ಯಡಹಳ್ಳಿಮಠ

ನನ್ನ ಕವಿತೆಗಳಲಿ ,
ನನ್ನನು ಹುಡುಕದಿರಿ
ನನ್ನ ಪದಗಳಲಿ ,
ನನ್ನನು ನೋಡದಿರಿ

ನಾ ಕವಿಯಲ್ಲವೇ ?
ರವಿ ಕಾಣದ್ದನ್ನು, ಕವಿ ಕಾಣಬಲ್ಲನಲ್ಲವೇ ??
ಕಾಲಿಡದ ಪ್ರಪಂಚದಲಿ ,
ನಡೆಯುವುದೆನಗೆ ಗೊತ್ತು
ಕೇಳದ ದನಿಗೆ,
ಹಾಡುಗುವುದೆನಗೆ ಗೊತ್ತು

ನನ್ನದಲ್ಲದ ಭಾವನೆಯನೂ ,
ಬಣ್ಣಿಸುವುದೆನಗೆ ಗೊತ್ತು
ನನ್ನದಲ್ಲದ ಅಳುವಿಗೂ
ಆಕ್ರಂದಿಸುವುದೆನಗೆ ಗೊತ್ತು
ಇಲ್ಲದ ಪ್ರೀತಿಯಲಿ
ವಿಹರಿಸುವುದೂ ಗೊತ್ತು
ಇಲ್ಲದ ವಿರಹದಲಿ
ಉರಿಯುವುದೂ ಗೊತ್ತು

ಕವಿಯನು ಬರೀ ,ಕವಿಯಂತಷ್ಟೇ ತಿಳಿ .
ಪದಗಳ ಅವನನುರಾಗವನಷ್ಟೇ ತಿಳಿ ..
ಕವಿತೆಗಳಲಿ ನಾನಿಲ್ಲ
ಪದಗಳಲಿ ನಾ ಸಿಗುವುದಿಲ್ಲ
ಓ ಓದುಗನೇ , ,
ಕವಿಮನದ ಸಾಗರದಿ ಭಾವನೆಗಳು ಹಲವು
ಕ್ಷಣ ಕ್ಷಣಕೂ ಅಪ್ಪಳಿಸುವ ಅಲೆಗಳು ಹಲವು
ಅದೆಷ್ಟೋ ಭಾವಗಳ ಸಂಗಮವದು
ಅದೆಷ್ಟೋ ಅಕ್ಷರಗಳ ಸರಿಗಮವದು

ಕವಿಯನು ಬರೀ ಕವಿಯಂತಷ್ಟೇ ತಿಳಿ..
ಕವಿಯಂತಷ್ಟೇ ತಿಳಿ….