ಗಜಲ್
ಗಜಲ್
ದೀಪಿಕಾ ಚಾಟೆ
ಪಟ್ಟದಲ್ಲಿರಲು ಅಪವಾದಕೆ ಅಂಜಿ ನೀತಿಯ ತೊರೆಯದಿರು ನೀನು
ಬೆಟ್ಟದಲ್ಲಿರಲು ಮೃಗಗಳಿಗೆ ಹೆದರಿ ಪ್ರೀತಿಯ ಮರೆಯದಿರು ನೀನು
ಕಷ್ಟದಲ್ಲಿರಲು ಉಪಕಾರವ ಮಾಡದೇ ಇರುವುದುಂಟೇ ಹೇಳು
ಮುಷ್ಠಿಯಲ್ಲಿರಲು ಧನಕನಕವ ದಾನಮಾಡದೇ ಮೆರೆಯದಿರು ನೀನು
ಮನಸನು ಮಾಗಿಸುತ ಸಂಬಂಧಗಳ ಬೆಸೆಯಲು ಬಂಧವದು ಮೆಚ್ಚುವುದು ಕಾಣಾ
ಕನಸನು ಕಾಣುತ ಬಾಂಧವ್ಯಗಳಲಿ ಕಹಿಯಂಥ ವಿಷವನು ಬೆರೆಸದಿರು ನೀನು
ಒಲವ ಬಳ್ಳಿಯಲಿ ಕಾಮನಬಿಲ್ಲಿನಂತಹ ಗೆರೆಯು ಮೂಡಿದರೆ ಚೆಂದಲ್ಲವೇ
ಚೆಲುವ ಕಳೆಯಲಿ ಬೇಸರದ ಮುನ್ನುಡಿಯನು ಬರೆಯದಿರು ನೀನು
ಹೊನ್ನ ದೀಪವು ಬೆಳಗಿ ಪ್ರಶಾಂತತೆಯ ಹರಡುವುದು ಕಾಣುತಿದೆ ನೋಡು
ಕಣ್ಣ ಹೊಳಪಲಿ ಅನುರಾಗ ಅರಳಿರಲು ಬದಿಗೆ ಸರಿಯದಿರು ನೀನು
About The Author
