ಗಝಲ್
ಶಂಕರಾನಂದ ಹೆಬ್ಬಾಳ
ಮುರುಕು ಗುಡಿಸಲಿನ ಬಡವರ ನೋವಿಗೆ
ದನಿಯಾಗದ ನಿನ್ನ ಜನ್ಮ ಸಾರ್ಥಕವೆ
ತಿರಿದು ತಿನ್ನುವ ಹಸಿದೊಡಲಿಗರ ಅನ್ನವನು
ಹಾಕಲಾಗದ ನಿನ್ನ ಜನ್ಮ ಸಾರ್ಥಕವೆ
ಸ್ವಾರ್ಥ ಸಾಧನೆಗೆ ಹಗಲಿರುಳು ಅಧಿಕಾರಕೆ
ದುಂಬಾಲು ಬಿದ್ದೆಯಲ್ಲವೆ
ವ್ಯರ್ಥ ಜೀವನದಲಿ ಪರರಿಗೆ ಸಹಾನುಭೂತಿ
ತೋರಲಾಗದ ನಿನ್ನ ಜನ್ಮ ಸಾರ್ಥಕವೆ
ನೀಡುವ ಗುಣವನ್ನು ಧರಿಸಿ ಹೊಳೆವ
ಮಾಣಿಕ್ಯನಾಗು ಜಗದಿ
ಸೂಡಿಯ ತೆರದಲಿ ತನ್ನನ್ನು ಸುಟ್ಟುಕೊಂಡು
ಬೆಳಕಾಗದ ನಿನ್ನ ಜನ್ಮ ಸಾರ್ಥಕವೆ
ಕ್ಷಮೆ,ದಯೆ,ವಾತ್ಸಲ್ಯಗಳ ಮಹಾಮೂರ್ತಿ
ಸದ್ಗುಣಿಯಾಗು ದೊರೆಯೆ
ಪ್ರಮಾದಗೈದವರಿಗೆ ಪಶ್ಚಾತಾಪದ ಚಣವನ್ನು
ಕೊಡಲಾಗದ ನಿನ್ನ ಜನ್ಮ ಸಾರ್ಥಕವೆ
ಹರಿವ ಹೊಳೆಯಂತೆ ಬಾಳಬಂಡಿಯ
ಎಡರು ತೊಡರುಗಳ ದಾಟು
ಮರೆಯದ ಅಭಿನವನ ಕವಿತೆಯ ಶ್ಲಾಘನೆ
ಮಾಡಲಾಗದ ನಿನ್ನ ಜನ್ಮ ಸಾರ್ಥಕವೆ
About The Author
