ಗತಿಸಿದ್ದೆಲ್ಲಾ ಇತಿಹಾಸವೆಂದಿದ್ದೆ ಮರುಕಳಿಸಿದೆ ನೀ ಏನೆನ್ನಲಿ
ನನ್ನೊಳು ನಾ ನಶಿಸಿದ್ದಾಯಿತು ಇನ್ನು ಈ ಕನಸು ನಿನಗಾಗಿ

ಹಲುಬಿದೆ ಹುಡುಕಾಡಿದೆ ಅರಿಯದೆ  ಅಲೆಮಾರಿಯಾದೆ
ಬಾಳಗುರಿಯ ಗುರುತಾಯಿತು ಇನ್ನು ಈ ಗೆಲುವು ನಿನಗಾಗಿ

ಹಣೆಬರಹ ಓದಾಯಿತು ಹಸ್ತ ರೇಖೆಗಳೆಲ್ಲ ಎಣಿಸಿದ್ದಾಯಿತು
ತಂಗಾಳಿ ಇತ್ತ ಸುಳಿದಾಯಿತು ಇನ್ನು ಈ ತಂಪು ನಿನಗಾಗಿ

ಚಂದಿರನು ಬಂದ ಚುಕ್ಕಿಗಳನು ತಂದ  ಅಂಗಳಕೆ ಜೊತೆಯಲಿ
ಮಲ್ಲಿಗೆಯು ಬಿರಿದಾಯಿತು ಇನ್ನು ಈ ಘಮಲು ನಿನಗಾಗಿ

ತಮ ಕಳೆದು ಹೋಯಿತು  ಬಂದಿತು ಇಂದೇ ದೀಪಾವಳಿ
ಒಲವ ಪಣತಿ ಹಚ್ಚಾಯಿತು ಇನ್ನು ಈ ಪ್ರಭೆಯು ನಿನಗಾಗಿ