ಸರ್ವಮಂಗಳ ಜಯರಾಂ ಗಜಲ್ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಗಜಲ್‌ ಸಂಗಾತಿ

ಸರ್ವಮಂಗಳ ಜಯರಾಂ ಗಜಲ್

ಸದ್ದಿಲ್ಲದೆ ಹರಿಯುವ ಚೇತನವಿದು ಜೀವದ್ರವ್ಯ /
ಪಾಪವ ಕಳೆಯುವ ಪಾವನವಿದು ಜೀವದ್ರವ್ಯ /

ಬೆಟ್ಟ ಗುಡ್ಡಗಳಲ್ಲಿ ಕಲ್ಲು ಸಂದಿಗಳಲ್ಲಿ ಜನನ /
ಸದಾ ಮೊರೆಯುವ ಕೀರ್ತನವಿದು ಜೀವದ್ರವ್ಯ /

ಬಳುಕುವ ಹೊನಲಿನಲಿ ಬಯಲೆಲ್ಲಾ ಹಚ್ಚ ಹಸಿರು /
ಕಾನನದ ತುಂಬ ನಗುವ ಸುಮನವಿದು ಜೀವದ್ರವ್ಯ /

ಖಗ ಮೃಗ ಪಾಲನೆಗೆ ನಿಸರ್ಗವಾಗಿದೆ ತೊಟ್ಟಿಲು /
ಪ್ರಕೃತಿ ಮಾತೆಗೆ ಉಸಿರಿನ ಭಾವನವಿದು ಜೀವದ್ರವ್ಯ /

ಹೊನ್ನೆ, ಮತ್ತಿ,ಬೀಟೆ, ಬಿದಿರು ಶ್ರೀಗಂಧದ ಕಾಡು /
ವನಸಿರಿ ಗರ್ಭಕೆ ಉತ್ಸಾಹದ ನರ್ತನವಿದು ಜೀವದ್ರವ್ಯ /

————————————————————————————————————–
ಸರ್ವಮಂಗಳ ಜಯರಾಂ.