ಕಾವ್ಯ ಸಂಗಾತಿ
ಶಾಲಿನಿ ಕೆಮ್ಮಣ್ಣು
ʼಹೊಸತನಕೆ ಸ್ವಾಗತʼ
ವಸಂತ ಕಾಲ ಬಂದಿಹುದು ನವ ಕಳೆಯನು ಹೊತ್ತು/
ಹೊಸತನವನು ತುಂಬಿಹುದು ಸವಿಗನಸನು ಬಿತ್ತು//
ಬ್ರಹ್ಮಾಂಡ ಸೃಷ್ಟಿಯ ಆರಂಭವ ನೆನೆದು/
ನವಯುಗದ ಉದಯಕ್ಕೆ ಜಗವು ಅಣಿಯಾಗಿಹುದು//
ಚೈತ್ರದ ಸಂಭ್ರಮದಿ ಪ್ರಕೃತಿಗೆ ಹೊಸ ಕಳೆಯು/
ಪ್ರತಿ ವರುಷ ನಮಗೆಲ್ಲ ಹೊಸ ಚೈತನ್ಯವು//
ಬೇವು ಬೆಲ್ಲ ಮೆಲ್ಲುತಲಿ ಯುಗಾದಿಯಂದು/
ಸಮಚಿತ್ತದಿಂದ ಸಿಹಿ ಕಹಿಯ ಸ್ವೀಕರಿಸಿರೆಂದು//
ಮರದಲಿ ಹೊಸ ಹೂ ಬಿಟ್ಟಿದೆ ನೋಡಿರಿ/
ಚಿಲಿಪಿಲಿ ಕಲರವಕೆ ಮೈ ಮರೆತು ಹಾಡಿರಿ//
ಸೃಷ್ಟಿಯ ಹೊಸತನ ಹಬ್ಬದ ವಾತಾವರಣ/
ಮಾವಿನ ಬೇವಿನ ಬಗೆ ಬಗೆ ಬಣ್ಣದ ತೋರಣ//
ಸ್ನೇಹ ಸಾಮರಸ್ಯದಿ ಎಲ್ಲರೊಡೆ ಕೂಡುತ /
ಜೀವನ ರಸಗಳ ಆನಂದದಿ ಸವಿಯುತ//
ಇಷ್ಟರಲ್ಲಿ ಸಂತಸ ಹಂಚುತ ಬೆಸೆಯುವ/
ಪ್ರೀತಿ ಸಹಬಾಳ್ವೆಯ ಆಶಯವ ಬೆಳೆಸುವ//
ಮನಗಳ ಮನೆಗಳ ಶುದ್ಧ ಮಾಡೋಣ/
ನಿರ್ಮಲ ನಿಕಷದಿ ನಿರಾಳರಾಗೋಣ//
ಶಾಲಿನಿ ಕೆಮ್ಮಣ್ಣು
