ಡಾ ಅನ್ನಪೂರ್ಣ ಹಿರೇಮಠ ಅವರ ಕವಿತೆ-ʼಬೆಳಕ ಬಾಚಿದೆʼ

ಕಾವ್ಯ ಸಂಗಾತಿ

ಡಾ ಅನ್ನಪೂರ್ಣ ಹಿರೇಮಠ

ʼಬೆಳಕ ಬಾಚಿದೆʼ

ಬಿಳಿ ಮೋಡ ಮಾಗಿ ತೂಗಿ
ಮಳೆ ಬರುವ ಹಾಗಿದೆ ಇಂದು
ಸೂರ್ಯನನೇ ನುಂಗಿ
ಕಿರಣಗಳ ಮರೆಮಾಚಿ
ಬೆಳಕನೆಲ್ಲ ಬಾಚಿದೆ
ಹಚ್ಚ ಹಸಿರು ತೂಗುತಿದೆ //

ವಸಂತ ಹಸಿರಾಗಿಸಿದ
ಆ ಗುಡ್ಡಬೆಟ್ಟ ಮೆಲ್ಲ ಮೆಲ್ಲನೆ
ಮಂಜು ಹಾಸಿ ಕಾಣದಾಗಿ
ಎಲೆಗಳ ಮೇಲೆ ಉದುರುವ
ಹನಿ ಜಾರಿ ಜಾರಿ
ಹೊಲಗದ್ದೆಯೆಲ್ಲ ತಂಪು ತಂಪು
ಹೂ ಸುಮಗಳ ಇಂಪು ಇಂಪು //

ಆಕಾಶ ಬಾಗಿ ಬಾಗಿ
ಇಳೆಯ ಚುಂಬಿಸಿದಂತೆ
ಮಣ್ಣ ಕಣಕಣದ ಕಂಪು
ಅರಳಿದೂವಿನ ಪರಿಮಳ
ಗಾಳಿ ಗಂಧದೊಡಗೂಡಿ
ಮನಕೆ ತಂದಿದೆ ಮಂಪರು //

ಸುಳಿ ಸುಳಿದು ತಾಕುತಿಹ
ತಂಗಾಳಿಯ ಹೊನಲಿಗೆ
ಮೈ ಜುಂಮ್ ಎನಲು
ಬಯಕೆ ಬಾಂದಳ ಕಲಕಿ
ಸ್ಪರ್ಶ ಸುಖವನೆಕೊ
ಬಯಸಿತು ಮನ
ಈ ನಿರಾಳ ಬಯಲಿನಲಿ//

---

ಡಾ ಅನ್ನಪೂರ್ಣ ಹಿರೇಮಠ