ಮಧುಮಾಲತಿರುದ್ರೇಶ್‌ ಅವರ ಕವಿತೆ-ಮರೆತೂ ಮರೆಯದಿರು

ಕಾವ್ಯ ಸಂಗಾತಿ

ಮಧುಮಾಲತಿರುದ್ರೇಶ್‌

ಮರೆತೂ ಮರೆಯದಿರು

ಕದ್ದು ಕದ್ದು ನೋಡುತಿಹೆ ಏಕೆ ಮಾಧವ
ನಾನೆಂದೋ ಅರಿತಿಹೆ ನಿನ್ನಂತ ರಂಗವ

ಕಿವಿಯಲಿ ಉಸುರಿಹುದು ಆ ಮಲಯ ಮಾರುತ
ನೀ ಬರುವ ಸದ್ದನು ರಟ್ಟು ಮಾಡುತ

ಸಾವಿರ ಗೋಪಿಕೆಯರು ನಿನ್ನರಸಿ ಬಂದರೂ
ಬಲ್ಲೆ ನಾನು ಈ ರಾಧೆಯೇ ನಿನ್ನ ಉಸಿರು

ಕಂಡೆ ನನ್ನನೇ ನಿನ್ನ ಕಂಗಳ ಕೊಳದಲಿ
ಅಂತರವೆಲ್ಲಿಯದು ಈ ನಮ್ಮ ಅಂತರಂಗದಲಿ

ಉಸಿರ ಕಣಕಣದಲೂ ನೀ ಬೆರೆತಿರಲು
ಸವಿ ಯಾತನೆಯಿದೆ ನಿನ್ನ ಕಾಯುವಿಕೆಯಲೂ

ನೀ ಬರುವೆಯಾದರೆ ಯುಗವೂ ಕ್ಷಣದಂತೆ
ಕಾಪಿಡುವೆ ನಿನ್ನೊಲವ ಆ ಕಣ್ಣ ರೆಪ್ಪೆಯಂತೆ

ತೊರೆಯದಿರು ಈ ಮಧುರ ಮೈತ್ರಿಯನು
ಮರೆತೂ ಮರೆಯದಿರು ಈ ರಾಧೆಯನು

---

ಮಧುಮಾಲತಿರುದ್ರೇಶ್