ಅಂಕಣ ಸಂಗಾತಿ

ಅನುಭಾವ

ಡಾ.ಸಾವಿತ್ರಿ ಮಹಾದೇವಪ್ಪ ಕಮಲಾಪುರ

ಅಕ್ಕಮಹಾದೇವಿಯವರ ವಚನ

ಆವಾಗಳೂ ಎನ್ನ ಮನ ಉದರಕ್ಕೆ ಹರಿವುದು .ಕಾಣಲಾರೆನಯ್ಯಾ ನಿಮ್ಮುವನು. ಭೇದಿಸಲರಿಯೆ .ಮಾಯದ ಸಂಸಾರದಲ್ಲಿ ಸಿಲುಕಿದೆನು ಎನ್ನದೇವ ಚೆನ್ನಮಲ್ಲಿಕಾರ್ಜುನಯ್ಯಾ .ನಿಮ್ಮ ಹೊದ್ದುವಂತೆ ಮಾಡಾ ನಿಮ್ಮ ಧರ್ಮ.

ಈ ಜಗತ್ತಿನಲ್ಲಿರುವ ಬಹುಪಾಲ ಜನರು ತಮ್ಮ ಹೊಟ್ಟೆ ಉದರಕ್ಕಾಗಿಯೇ,ಬದುಕು ಸಾಗಿಸ ಹೊರಟಿರುವ ಜೀವಿಗಳು .ಅನೇಕ ಎಡರು ತೊಡರುಗಳ ಮದ್ಯ  .ಅನೇಕ ಜನಕೃತ ವೇಷಗಳನ್ನು ಹಾಕಿ ತಿರುಗುವ ಜನರನ್ನು  ಕಾಣಬಹುದು .

ಈ ಮಾಯಾ ಪ್ರಪಂಚದ ಏಳು ಬೀಳಿನ ನಲಿವಿನಲಿ ಎದ್ದು ಸಾಗುವ ದಿವ್ಯ ಅನುಭವ ಜನರಿಗೆ ಆಗುವುದು .
ಈ ಜಗತ್ತಿನ ಬಹುಪಾಲು ಜನ ಈ ಸಂಸಾರ ಎಂಬ ಬಂಧನದಿಂದ ಪಾರು ಆಗುವ ಬಗೆಯನ್ನು ಕಂಡರೆ, ಇನ್ನೂ ಕೆಲವು ಜನ ಸಂಸಾರದಲ್ಲೇ ಇದ್ದುಕೊಂಡೆ ದೇವರನ್ನು ಕಾಣುವ ಬಗೆಯನ್ನು ಕಾಣಬಹುದಾದ ಅನೇಕ ಶರಣರ ವಚನಗಳು ನಮಗೆ ಮಾದರಿಯಾಗಿ ನಿಲ್ಲುತ್ತವೆ .ಅಕ್ಕಮಹಾದೇವಿಯವರ ಈ ಒಂದು ವಚನದಲ್ಲಿ .

 *ಆವಾಗಳೂ ಎನ್ನ ಮನ ಉದರಕ್ಕೆ ಹರಿವುದು .
 ಕಾಣಲಾರೆನಯ್ಯಾ ನಿಮ್ಮುವನು*

ಹೇ ಚೆನ್ನಮಲ್ಲಿಕಾರ್ಜುನಾ ನನ್ನ ಮನ ನನ್ನ ಉದರ ಅಂದರೆ,ನನ್ನ ಹೊಟ್ಟೆಯನ್ನು ತುಂಬಿಸಿಕೊಳ್ಳುವುದರಲ್ಲೇ ನಾನು ನನ್ನ ಹೆಚ್ಚಿನ ಸಮಯವನ್ನು ಕಳೆದೆ .ನಿನಗಾಗಿ ನಾನು ನನ್ನ ಸಮಯವನ್ನು ಕಳೆಯಲಿಲ್ಲ. ಹೇ ಚೆನ್ನಮಲ್ಲಿಕಾರ್ಜುನಾ .
ಯಾರು ನಿನಗಾಗಿ ಹಂಬಲಿಸುತ್ತಿದ್ದಾರೆ ?
ಯಾರೂ ನಿನ್ನ ಬಗ್ಗೆ ಚಿಂತಿಸಲಾರರು. ಅವರವರ ಹೊಟ್ಟೆಯನ್ನು ತುಂಬಿಸಿಕೊಳ್ಳುವುದರಲ್ಲೇ ಕಾಲವನ್ನು ಕಳೆಯುತ್ತಿದ್ದಾರೆಯೇ ಹೊರತು, ನಿನಗಾಗಿ ಮರುಗುವವರನ್ನು ನಾ ಕಾಣೆ ಚೆನ್ನಮಲ್ಲಿಕಾರ್ಜುನಾ .

 ಭೇದಿಸಲರಿಯೆ .ಮಾಯದ ಸಂಸಾರದಲ್ಲಿ ಸಿಲುಕಿದೆನು .

ಹೇ ದೇವಾ ಚೆನ್ನಮಲ್ಲಿಕಾರ್ಜುನಯ್ಯ .ಈ ಮಾಯಾ ಪ್ರಪಂಚದಲ್ಲಿರುವ ಸಂಸಾರ ಎಂಬ  ಜಂಜಾಟದ ಬಲೆಯಲಿ  ಎನ್ನ ಮನ ಸಿಲುಕಿ  ಚಂಚಲವಾಗಿದೆ .ನನ್ನ ಮನಸ್ಸು ನೀರಿನ ಹಾಗೆ ಹರಿಯುತ್ತಿದೆ. ಅದು ಒಂದು ಕಡೆ ನಿಲ್ಲುತ್ತಿಲ್ಲ. ಈ ತೆರನಾದ ಮನವನ್ನು ನಾನು ಹೊತ್ತು ತಿರುಗುತ್ತಿರುವೆ. ಹಲವು ತೆರನಾಗಿ ತಿರುಗುವ ಹಲವು ಕಡೆ ಅಲೆಯುವ ನನ್ನ ಮನವನ್ನು ಒಂದು ಕಡೆ ನಿಲ್ಲಿಸಿ  ಹಿಡಿದಿಟ್ಟು ನಿಮ್ಮತ್ತ ತೋರು ಎನ್ನದೇವಾ ಚೆನ್ನಮಲ್ಲಿಕಾರ್ಜುನಾ .

 ಚೆನ್ನಮಲ್ಲಿಕಾರ್ಜುನಯ್ಯಾ .
 ನಿಮ್ಮ ಹೊದ್ದುವಂತೆ ಮಾಡಾ ನಿಮ್ಮ ಧರ್ಮ

ಈ ಸಂಸಾರ ಎಂಬ ಮಾಯದ  ಬಲೆಯಲ್ಲಿ ಸಿಲುಕಿ  ಹೊರ ಬರದೇ ನರಳಾಡಿ ಅದರಲ್ಲಿಯೇ ಇದ್ದು ಬಿಡುತ್ತಾರೆ .ಆದರೆ 12 ನೇ ಶತಮಾನದ ಶರಣರು ಈ ಸಂಸಾರ  ಎಂಬ ಬಂಧನದಿಂದ ಬಿಡುಗಡೆ ಬಯಸದೇ ,ಸಂಸಾರದಲ್ಲಿ ಇದ್ದುಕೊಂಡೇ ಕಾಯಕ ಜೀವಿಗಳಾಗಿ ನಿಜದ ಅರಿವು ಅರಿತು . ಇದ್ದು ಇಲ್ಲದಂತೆ ಇದ್ದು ತಾವೇ ದೇವರಾಗಿ ಹೋದರು .ನನ್ನನ್ನು ಸಹ ಈ  ಸಂಸಾರದ ಜಂಜಾಟದಿಂದ ಮುಕ್ತ ಗೊಳಿಸಿ ನಮ್ಮತ್ತ ತೋರಾ .ಅದು ನಿಮ್ಮ ಧರ್ಮ ಎನ್ನುತ್ತಾಳೆ ಅಕ್ಕಮಹಾದೇವಿಯವರು

---

 ಡಾ ಸಾವಿತ್ರಿ ಮಹಾದೇವಪ್ಪ ಕಮಲಾಪೂರ