ಡಾ ಅನ್ನಪೂರ್ಣ ಹಿರೇಮಠ ಅವರ ಗಜಲ್

ಕಾವ್ಯ ಸಂಗಾತಿ

ಡಾ ಅನ್ನಪೂರ್ಣ ಹಿರೇಮಠ

ಗಜಲ್

ಕುಸಿಯುತಲೇ ಕಹಿ ನುಂಗುವ ತಾವರೆಯ ವೇದನೆ ಅರಿತವರಾರು
ಜುಳುಗುಡುತ ತಾಪ ಸಹಿಸುವ ಜಲಧಾರೆಯ ವೇದನೆ ಅರಿತವರಾರು

ಉಸಿರು ನೀಡಿ ಸಲಹುವ ಭೂರಮೆಯ ಸಹನೆ ತಾಳ್ಮೆಗೆ ಸಮರುಂಟೆ
ಬೆಳಗುತಲಿ ಮೈಸುಟ್ಟುಕೊಳ್ಳುವ ದೀವಿಗೆಯ ವೇದನೆ ಅರಿತವರಾರು

ಸಿಡಿಯುವ ಜ್ವಾಲಾಮುಖಿ ಒಡಲನು ಕೊರೆದರೂ ಸಹಿಸಬೇಕಿದೆ
ಕರಗುತಲೆ ಕೊರಗದೆ ತಾಳುವ ಮೊಂಬತ್ತಿಯ ವೇದನೆ ಬಲ್ಲವರಾರು

ಪ್ರಸವವೇದನೆಯ ನೋವು ಬಸುರಿಗಲ್ಲದೆ ಮತ್ತಾರಿಗೆ ತಿಳಿಯಲುಂಟು
ಬೆತ್ತಲೆ ದೇಹವೊಡ್ಡಿ ಏಟುಗಳ ತಿನ್ನುವ ಬಂಡೆಯ ವೇದನೆ ಅರಿತವರಾರು

ಬೂದಿಮುಚ್ಚಿದ ನಿಗಿನಿಗಿಪ ಕೆಂಡದಂತೆ ಅನುಳ ಕಷ್ಟ ಬಣ್ಣಿಸಲಾಗದು
ಮಿಂಚು ಗುಡುಗಿನೊಂದಿಗೆ ಸುರಿವ ಮಳೆಯ ವೇದನೆ ಅರಿತವರಾರು

ಡಾ ಅನ್ನಪೂರ್ಣ ಹಿರೇಮಠ