ಡಾ. ಸುಮಂಗಲಾ ಅತ್ತಿಗೇರಿ ಅವರ ಹನಿಗವನಗಳು

ಕಾವ್ಯ ಸಂಗಾತಿ

ಡಾ. ಸುಮಂಗಲಾ ಅತ್ತಿಗೇರಿ

ಹನಿಗವನಗಳು

ದೀಪಾವಳಿ

ಮೊನ್ನೆ ದೀಪದ ಹಬ್ಬ
ಅವರ ಮನೆಯಲ್ಲಿ ಅವರು
ನಮ್ಮ ಮನೆಯಲ್ಲಿ ನಾವು
ದೀಪ ಹಚ್ಚಿದೆವು ಮನೆತುಂಬ
ಆದರೆ,
ನಮ್ಮ ಮನದ ನಡುವಿನ
ಕತ್ತಲು ಮಾತ್ರ
ಕಳೆಯಲೇ ಇಲ್ಲ!
——————

 ಸೋಲು – ಗೆಲುವು

ಅವರು ಗೆದ್ದಿದ್ದಾರೆ
ನಾನು ಸೋತಿದ್ದೇನೆ
ಹೌದು
ಅವರು
ನನ್ನ ಮನಸ್ಸು
ಗೆದ್ದಿದ್ದಾರೆ!
ನಾನು
ಅವರ ಪ್ರೀತಿಗೆ
ಸೋತಿದ್ದೇನೆ!
—————-

 ಕಣ್ಣುಗಳು

ದ್ವೇಷಿಸುವ ಕಣ್ಣುಗಳು
ಕಿಡಿಕಾರುತ್ತವೆ
ಹೆಜ್ಜೆ ಹೆಜ್ಜೆಗೂ
ಪ್ರೀತಿಸುವ ಕಣ್ಣುಗಳು
ಮುಗುಳ್ನಗುತ್ತವೆ
ಅನುದಿನವು….
ಅನುಕ್ಷಣವು…..
——————-

 ಧರಣಿಗೆ

ಬಿಸಿಲ ಬೇಗೆಗೆ
ಬಾಯ್ದೆರೆದು ನಿಂತ ಭೂಮಿ
ಬಸವಳಿಯುತ್ತಿದೆ ಬರದಿಂದ
ಅದಕ್ಕೆ,
ರೈತರೆಲ್ಲ ದೊಡ್ಡ ದೊಡ್ಡ
ಪ್ಯಾನ್ ಹಾಕಿಸಿದ್ದಾರೆ
ಹೊಲದ ತುಂಬಾ
ದಣಿವಾರಿಸಿಕೊಳ್ಳಲು
ಧರಣಿಗೆ!
————-

 ಕನಸು ಮತ್ತು ಕವನ

ಕನಸುಗಳ ಕಟ್ಟುತ್ತೇನೆ
ಕವನದೊಳಗೆ
ಅಲ್ಲಿ ನನ್ನ ಕನಸುಗಳನ್ಯಾರು
ಕಸಿಯಲಾರರು
ಅದಕ್ಕೆ
ಕನಸಿನ ಗಾರೆಗಳ ಜೋಡಿಸುತ್ತ
ಕವನ‌ ಕಟ್ಟುತ್ತೇನೆ
ಕನಸುಗಾರಳಾಗಿ…
—————–

ಡಾ. ಸುಮಂಗಲಾ ಅತ್ತಿಗೇರಿ