ಸುಕನಸು ಅವರ ಹೊಸ ಗಜಲ್

ಕಾವ್ಯ ಸಂಗಾತಿ

ಸುಕನಸು

ಗಜಲ್

ಕಳೆದುಕೊಳ್ಳುವ ಆತಂಕವು ಆವರಿಸುವಷ್ಟು ಪ್ರೀತಿಸದಿರು ನನ್ನ
ಅತ್ಯಂತ ಮೋಹಪರವಶತೆ ಆಕ್ರಮಿಸುವಷ್ಟು ಪ್ರೀತಿಸದಿರು ನನ್ನ

ನನ್ನ ಸಹಜ ಗುಣ ನಿಸರ್ಗದ ಸಂಗ ಮೈಮರೆತು ನಡೆಯುವುದು
ಪರಪಂಚವ ಮರೆತು ನಿನ್ನೇ ಆರಾದಿಸುವಷ್ಟು ಪ್ರೀತಿಸದಿರು ನನ್ನ

ನಿನ್ನದೇ ನೆನಪುಗಳ ಜೊತೆ ಕ್ಷಣ ಕ್ಷಣವೂ ಜೀವಿಸುವ ಬಯಕೆ
ಸುಖವಲ್ಲದ ಏಕಾಂತವನು ಆಸ್ವಾದಿಸುವಷ್ಟು ಪ್ರೀತಿಸದಿರು ನನ್ನ

ಸಂತಸದ ನೆಮ್ಮದಿ ಮನದಾಳದಲ್ಲಿ ಚಿಗುರಿ ಮೊಳಕೆಯೊಡೆದಿದೆ
ಮಳೆಬಿಲ್ಲು ಕೈಲಿದೆಯೆಂದು ಆಭಾಸಿಸುವಷ್ಟು ಪ್ರೀತಿಸದಿರು ನನ್ನ

ಅರಳಿದ ಮಲ್ಲಿಗೆಯ ಸುಮ ಕಾದಿದೆ ದುಂಬಿಯ ಪರಾಗಸ್ಪರ್ಶಕೆ
ಅಕ್ಕರೆ ಇಚ್ಛಿಸಿ ನೋವನ್ನು ಆಹ್ವಾನಿಸುವಷ್ಟು ಪ್ರೀತಿಸದಿರು ನನ್ನ

---

ಸುಕನಸು