ಕಾವ್ಯ ಸಂಗಾತಿ
ಮುತ್ತು ಬಳ್ಳಾ ಕಮತಪುರ
ಗಜಲ್
ಹೂಗಳ ಬಿಡಿಸಿ ಮುಡಿಸದೆ ಬಾಡಿದಂತೆ ಈ ಬದುಕು
ಎಲೆಯ ಮೇಲಿನ ನೀರ ಹನಿ ಜಾರಿದಂತೆ ಈ ಬದುಕು
ಬೆಳೆದ ಬೆಳೆಯ ಋಣವನು ತೀರಿಸದ ದುಶ್ಯಕ್ತಿ ಲೋಕ
ಗಿಡಮರಗಳ ನೆರಳು ಮರೆತು ಸಾಗಿದಂತೆ ಈ ಬದುಕು
ಸವೆದ ದಾರಿಯಲಿ ಮುಳ್ಳಿಟ್ಟು ಸೆಣಸುತಿದೆ ಪರಪಂಚ
ಬೆರೆತು ಬಾಳಿದರೆ ಜಗವನು ಕೂಡಿದಂತೆ ಈ ಬದುಕು
ಕತ್ತಿ ಅಲಗಿನ ಮೇಲೆ ನಡುಗಿ ಹೋಯಿತು ಬಡ ಜೀವ
ಭಂಗುರ ದೇಹಕೆ ಶೃಂಗಾರ ಮಾಡಿದಂತೆ ಈ ಬದುಕು
ಕನಿಕರದ ಕರವು ಧರ್ಮದ ಪರದೆ ಮುಚ್ಚೀತು ಮುತ್ತು
ಎದೆಯ ಕದವ ಮುರಿದು ಪುರ ಕಟ್ಟಿದಂತೆ ಈ ಬದುಕು
—————————–
ಮುತ್ತು ಬಳ್ಳಾ ಕಮತಪುರ
