ಕಾವ್ಯ ಸಂಗಾತಿ
ಅಮ್ಮು ರತನ್ ಶೆಟ್ಟಿ
ಅಂತರ್ಮುಖಿ
ಇರಬಹುದು ಸದಾ ಒಂಟಿಯಾಗಿಯೇ ಅವಳು
ಬೇಸರ ತಂದಿರಬಹುದು ಮತ್ತಾರದೋ ನೆರಳು
ಯಾರಿಗೆ ಯಾರು ಹಿತವರೋ ಬಲ್ಲವರು ಯಾರು
ಅಂತರ್ಮುಖಿಯಾಗಿ ಸಂಭಾಷಣೆ ನಡೆಸುವಳವಳು
ಯಾರ ಸಂಗದ ಅನಿವಾರ್ಯತೆ ಅವಳಿಗೆ
ಹೊತ್ತು ಹೆತ್ತವರನೇ ಬಿಟ್ಟು ತಾಳಿಗೆ ತಲೆಬಾಗಿ ನಡೆದವಳಿಗೆ
ಅವನ ಭಾವನೆಗಳಿಗೆ ತನ್ನಾಸೆಗಳ ಒತ್ತೆ ಇಡಲು ಸಾಧ್ಯವೇ
ಅಂತರ್ಮುಖಿಯಾಗಿ ಯೋಚಿಸಿದಳು ತನ್ನೊಳಗೆ ತಾನೇ
ಆಡಿದ ಮಾತುಗಳು ಕ್ಷಣದಲ್ಲೇ ಬದಲಾಗಬಹುದು
ನೀಡಿದ ಭಾಷೆಗಳು ಕೊಟ್ಟವರಿಗೆ ಮರೆತು ಹೋಗಬಹುದು
ಅಂತರಂಗದ ಭಾವನೆಗಳ ಮತ್ತಾರದೋ ಜೀತಕ್ಕೆ ಹೇಗೆ ಇಡಬಹುದು
ತನ್ನೊಡಲಲ್ಲಿ ಉರಿವ ಕೆಂಡವ ಅದೆಷ್ಟು ದಿನ ಬಚ್ಚಿಡಬಹುದು
ಕನಸುಗಳ ಸಾಕಾರಕ್ಕೆ ಯಾರ ಸಹಾಯವೂ ಬೇಕಿಲ್ಲ
ಹಾರುವ ಹಕ್ಕಿಗೆ ರೆಕ್ಕೆಯ ಹೊರತೂ ಮತ್ತಾರ ನಿರೀಕ್ಷೆಯಿಲ್ಲ
ಅವನ ಬಂಧನದಿ ಬಂಧಿಯಾಗಿ ಕಳೆಯಲಾಗದು ಬದುಕೆಲ್ಲಾ
ಸಾಧಿಸುವ ಮುನ್ನ ಅಡಚಣೆಗಳು ಯಾರಿಗೆ ಇರುವುದಿಲ್ಲ
ಅಮ್ಮು ರತನ್ ಶೆಟ್ಟಿ
