ಕಾವ್ಯ ಸಂಗಾತಿ
ಮುಖ ಪುಸ್ತಕದ ಹನಿಗಳು…….
ಎ.ಎನ್.ರಮೇಶ್.ಗುಬ್ಬಿ
- ಗೋಡೆ ಕಥೆ.!
ಕೆಲವರ ಗೋಡೆಯಲಿ
ಬರೀ ಆತ್ಮರತಿಯ ಅಬ್ಬರ.!
ಕೆಲವರ ಗೋಡೆಯಲಿ
ಕೆಸರೆರಚಾಟದ ಗೊಬ್ಬರ.!
- FB ಭಾವಾರ್ಥಗಳು..!
ಲೈಕು ಮಾಡಿದ್ದಾರೆಂದರೆ..
ಮೆಚ್ಚಿದ್ದಾರೆಂದಲ್ಲ ಅರ್ಥ
ನೋಡಿದ್ದಾರೆಂದು ಅರ್ಥ
ಕಾಮೆಂಟಿಸಿದ್ದಾರೆಂದರೆ..
ಬೆನ್ತಟ್ಟುತ್ತಿದ್ದಾರೆಂದಲ್ಲ ಅರ್ಥ
ಮಗನೆ ನೀನು ಹಾಕಿದ್ದನ್ನು
ನಾನು ನಿತ್ಯ ಓದುತ್ತಿದ್ದೇನೆ
ನಾನು ಹಾಕುವುದನ್ನೂ ನೀನು
ಓದಿ ಪ್ರತಿಕ್ರಯಿಸು ಎಂದರ್ಥ.!
- ಮರ್ಮ..!
ಮುಖಪುಸ್ತಕದಿ ಬಹಳಷ್ಟು ಮಂದಿ
ತಮ್ಮ ಮುಖಚಿತ್ರ ಹಾಕಿಲ್ಲವೆಂದರೆ..
ಸ್ಫುರದ್ರೂಪಕೆ ದೃಷ್ಟಿಯಾದೀತೆಂಬ
ಅಂಕೆ ಶಂಕೆ ಭೀತಿಗಳಲ್ಲ ಪ್ರೇರಣ
ಏಕೆ ಅಂಗೈ ತೋರಿಸಿ ಅವಲಕ್ಷಣ
ಅನಿಸಿಕೊಳ್ಳಬೇಕೆಂಬುದೇ ಕಾರಣ..!
- FB ಫಸಲು.!
ಇಲ್ಲಿ ಕೆಲವರು ಸಾಧನೆ ತೋರುವುದಕಿಂತ
ನಿತ್ಯವೂ ವೇದನೆ ಕಾರಿಕೊಳ್ಳುವುದೇ ಹೆಚ್ಚು.!
ಪ್ರತಿಭೆ ಪರಿಶ್ರಮದ ಕಂಪು ಬೀರುವುದಕಿಂತ
ಪರಿತಪಿಸಿ ಅನುಕಂಪ ಗಿಟ್ಟಿಸಿಕೊಳ್ಳುವ ಹುಚ್ಚು.!
- ಗುಪ್ತಾಭಿಮಾನ..!
ಬರಹಕ್ಕಿಂತಲೂ ಬರೆವವರು
ಚೆಂದವಿದ್ದರೆ ಲೈಕು ಹೆಚ್ಚೆಚ್ಚು
ಹೆಣ್ಮಕ್ಕಳಾದರಂತು ಅಚ್ಚುಮೆಚ್ಚು
ಬರಹಕೆ ಕಾಮೆಂಟಿಸುವುದಕಿಂತ
ಇನ್ಬಾಕ್ಸಿನಲಿ ಹೋಗಿ ಹೋಗಿ..
ಕುಶಲೋಪರಿ ಕೇಳುವರೆ ಹೆಚ್ಚು
ಅಬ್ಬಾ ಅದೇನು ಕಾಳಜಿ ಹುಚ್ಚು.!
- ಮನಮನ ಕಥೆ.!
ಮುಖಪುಸ್ತಕ ಜಾಲತಾಣವೆಂದರೆ
ಕೆಲವರಿಗೆ ನಂಜುಕಾರುವ ವೇದಿಕೆ
ಕೆಲವರಿಗೆ ಭಟ್ಟಂಗಿತನದ ಭೂಮಿಕೆ
ಹಲವರಿಗೆ ಕಾಲಹರಣ ಕೈ-ಗಾರಿಕೆ
ಬೆರಳೆಣಿಕೆಯವರಿಗಷ್ಟೆ ಕಲೆ ಸಾಹಿತ್ಯ
ಚಿಂತನೆಗಳ ಕ್ರಿಯಾಶೀಲ ಪೀಠಿಕೆ.!
ಎ.ಎನ್.ರಮೇಶ್.ಗುಬ್ಬಿ.
