ಡಾ.ರೇಣುಕಾತಾಯಿ.ಸಂತಬಾ.ರೇಮಾಸಂ
ಗಜಲ್
ದಣಿವಿರದೆ ಬದುಕಿನ ಜಟಕಾ ಬಂಡಿ ತುಳಿದವನು ನಮ್ಮಪ್ಪ
ಸಂಸಾರ-ಸಾರಥಿ ಸಹನಾಮೂರ್ತಿಯಂತೆ ಜೀವಿಸಿದವನು ನಮ್ಮಪ್ಪ//
ದುಗುಡ-ದುಮ್ಮಾನಕ್ಕೆಲ್ಲ ಕಿರುನಗೆ ಬೀರಿದವನು ನಮ್ಮಪ್ಪ
ಮನೆಗೆಲ್ಲ ಗೆಲುವಿನ ಮಾಲೆಯ ಹೆಣೆದವನು ನಮ್ಮಪ್ಪ//
ಕಾಯಕಯೋಗಿ ಚೈತನ್ಯದ ಚಿಲುಮೆಯಿವನು ನಮ್ಮಪ್ಪ/
ಕಷ್ಟಗಳಿಗೆಲ್ಲ ಕೈಕೊಳ ಹಾಕಿ ಬಂಧಿಸಿದವನು ನಮ್ಮಪ್ಪ//
ಅನುಭವ ಶಾಲೆಯ ಗುರುವಿನಂತೆ ನಡೆದವನು ನಮ್ಮಪ್ಪ/
ಬೆವರ ಹನಿಯಲಿ ನಮ್ಮ ನೋವ ಮರೆಸಿದವನು ನಮ್ಮಪ್ಪ//
ದುಡಿಮೆಯನ್ನೆ ತಾಯಿ ತಂದೆಯಾಗಿ ನಂಬಿದವನು ನಮ್ಮಪ್ಪ/
ಕಾಯ ಕರಗಿಸುತ ಕೌಶಲದಲಿಯೆ ಮರೆಯಾದವನು ನಮ್ಮಪ್ಪ//
