ಕಾವ್ಯ ಸಂಗಾತಿ
ಸುರೇಶ ತಂಗೋಡ
ಹಸ್ತಾಂತರ
ಕಂದ ಮಲಗಿರುವಾಗಲೇ
ಕಣ್ಮರೆಯಾಗುವ
ಧಾವಂತದ ಬದುಕಿನಲಿ
ಅವರಪ್ಪನ ಪ್ರೀತಿ ಸಿಗದ ಮಗುವಿಗೆ
ತಂದೆಯ ಪ್ರೀತಿಯ ನೀಡು ಆತ್ಮಸಖಿ.
ತಾಯಿಯೊಟ್ಟಿಗೆ ತಂದೆಯಾಗಿ
ಅವನ ಬೇಕು-ಬೇಡಿಕೆಗಳನ್ನು
ಪೂರೈಸು.
ಅವನಿಗೆ ಮಾತ್ರ ಅಪ್ಪನ ನೆನಪಾಗದಂತೆ
ನಲಿಯುವಂತೆ ಮಾಡು.
ಪಾಲಕರ ಸಭೆಗೆ ನೀನೆ ಹೋಗು
ತಂದೆ ಬಂದಿಲ್ಲವೆಂಬ
ಬೇಜಾರು ಅವನಿಗಾಗದಂತೆ
ನೋಡಿಕೊ.
ಹೊಡೆದು-ಬಡಿದು ಬುದ್ಧಿ ಹೇಳದಿರು
ಮಾತಿನಲ್ಲಿ ಮನವರಿಕೆ ಮಾಡಿಸು.
ತಂದೆಯ ಕೆಲಸದ ಬಗ್ಗೆ
ಪೂರ್ತಿ ಏನನ್ನೂ ಹೇಳದಿರು…
ಅವನದೀಗ ಬಾಲ್ಯ .
ಬಾಲ್ಯದಿ ಬದುಕಲು ಬಿಡು.
ಅದಕ್ಕೆ ಇದೋ ಮಗನ ಮೇಲಿನ ತಂದೆಯ
ಜವಾಬ್ದಾರಿಯನ್ನು ನಿನಗೆ .
ಹಸ್ತಾಂತರಿಸುತ್ತಿದ್ದೇನೆ ಹರ್ಷದಿ
ಒಪ್ಪಿಸಿಕೊ ಸಂಗಾತಿ.
ಸುರೇಶ ತಂಗೋಡ
