ಕಾವ್ಯ ಸಂಗಾತಿ
ವೈಲೇಶ್ ಪಿ.ಕೊಡಗು
ಸಾಂಗತ್ಯ_ಪ್ರಕಾರ
ತಳಗುರು ಒಬ್ಬರು ಬೇಕು
ಕತ್ತಲೆ ಗರ್ಭದಿ ಮೆತ್ತಿದ ಕೊಳಕಲಿ
ಬೆತ್ತಲೆ ಭತ್ತೆಯು ನಾವು|
ಅತ್ತಲುಯಿತ್ತಲು ಸುತ್ತುತಿಹಾತ್ಮಕೆ
ಸುತ್ತಿದೆಯೆತ್ತಲು ನೋವು||
ಇಂದು ನರಾತ್ಮಕೆ ಸುಂದರ ಜಡವಿದು
ಸಂದಿಹ ಭಾಗ್ಯವಿದಂತೇ|
ಹಿಂದಿನ ಗೆಯ್ಮೆಯ ಮುಂದಿನ ಯೋಗವು
ನಿಂದಿರೆ ನಗುತಿಹಿರಂತೇ||
ಸುಂದರ ದೇಹಕೆ ಚೆಂದದ ಕಮ್ಮವು
ಬಂಧುರವಾಗಿದೆಯೆಲ್ಲಾ|
ನಿಂದಿಸಲೇತಕೆ ನೊಂದರೆ ಕೃತ್ಯಕೆ
ಬಂಧುವದಾಗುವುದಲ್ಲಾ ||
ಹೊಲೆಯನು ಕಳೆಯನು ಕಳೆಯಲು ತಲೆಯಲಿ
ಹೊಳೆಯಲು ಮಾಗಿದೆ ಕಾಲ|
ತಲೆಬುಡವಿಲ್ಲದ ಬಲೆಯೊಳಗಿಳಿದಿಹ
ತಳಮಳವಳಿಯುವ ಮೂಲ||
ಇಳೆಯಲಿ ಕಳೆಯಲಿ ಬೆಳೆಯದೇ ಕೊಳೆಗಳು
ಸುಳಿಯಿಂದಿಳಿದರೆ ಸಾಕು|
ಕುಳಿಯೊಳಗೆಳೆಯದೇ ತಳದಿಂದೆಳೆಯವ
ತಳಗುರುವೊಬ್ಬರು ಬೇಕು||
ಪ್ರಕಟಣೆಗಾಗಿ ಧನ್ಯವಾದಗಳು