ಕಾವ್ಯ ಸಂಗಾತಿ
ಸ್ಮಿತಾ ಬನಹಟ್ಟಿ
ನೇಗಿಲಯೋಗಿ
ಹಗಲಿರುಳು ಎನ್ನದೆ ದುಡಿವ ನೇಗಿಲಯೋಗಿ
ನಮಿಸುವೆವು ನಾವೆಲ್ಲರೂ ನಿನಗೆ ತಲೆಬಾಗಿ
ಮಣ್ಣಲ್ಲಿ ಉತ್ತಿ-ಬಿತ್ತುವದು ನಿನ್ನಯ ಕಾಯಕ
ಅದನ್ನೆ ಚಿನ್ನದಂತಾಗಿಸುವುದು ಶ್ರಮದಾಯಕ
ಬಿಸಿಲುಮಳೆಯಲ್ಲೂ ಸಾಗುವಂಥ ನಿನ್ನ ಕರ್ಮ
ಹಸಿವು ತಣಿಸುವಂತಹ ಅದು ನಿಸ್ವಾರ್ಥಧರ್ಮ
ಸುಖಸಂತಸವನು ಅದಲ್ಲಿಯೆ ಕಾಣುವ ತ್ಯಾಗಿ
ಬೆವರು ಸುರಿಸಿ ದುಡಿಯುತಿರುವೆ ನಮಗಾಗಿ
ನಿನ್ನ ಉಳುಮೆಯಿಂದಲೆ ನಿಂತಿಹುದು ಈ ಜಗ
ಅಂತೆಯೆ ಭೂಮಾತೆಗಾದೆ ನೀ ಚೊಚ್ಚಲಮಗ
ಬೆಳೆಸುವೆಯಯ್ಯಾ ಕೆಸರನ್ನೆ ನಂಬುತ ಹಸಿರು
ಸಕಲರಿಗೂ ನೀಡುತಿರುವೆ ಅನ್ನವೆಂಬ ಉಸಿರು
ಪ್ರತಿಯೊಂದು ಕಾಳಿಗೂ ಅನ್ನದಾತನಾಗಿ ಧಣಿ
ಸರ್ವಕಾಲಕೂ ನಾವೆಲ್ಲರೂ ನಿನಗೆ ಚಿರಋಣಿ
ಸ್ಮಿತಾ ಬನಹಟ್ಟಿ.
