ಕಾವ್ಯ ಸಂಗಾತಿ
ಅರ್ಚನಾ ಯಳಬೇರು
ಗಜಲ್
ಅಕ್ಷರಗಳ ಮುಷ್ಕರದಲಿ ಹೇಗೆ ಬಣ್ಣಿಸಲಿ ಭಾವಗಳ
ಹೊತ್ತಿಗೆಗಳ ಹೊಲದಲಿ ಹೇಗೆ ಬಿತ್ತರಿಸಲಿ ಭಾವಗಳ
ಚಿತ್ತ ಭಿತ್ತಿಯಲಿ ಚಿಂತೆಗಳ ಬಣ್ಣ ಬಣ್ಣದ ಚಿತ್ತಾರಗಳು
ಇತಿಹಾಸದ ಪುಟಗಳಲಿ ಹೇಗೆ ಹುಡುಕಲಿ ಭಾವಗಳ
ಮನದ ಮೌನವು ಮಮ್ಮಲ ಮರುಗುವುದ ಕಂಡೀರಾ
ಕಂಬನಿಯ ಕಡಲಿನಲಿ ಹೇಗೆ ಹತ್ತಿಕ್ಕಲಿ ಭಾವಗಳ
ತುಂಬು ಬಸಿರ ಹೊತ್ತ ಸುಪ್ತ ಸ್ವಪ್ನಗಳಿಗೆ ಪ್ರಸವ ವೇದನೆ
ವ್ಯಾಕುಲತೆಯ ವ್ಯೂಹದಲಿ ಹೇಗೆ ಭೇದಿಸಲಿ ಭಾವಗಳ
ನಿಸ್ಸಾರಗೊಂಡಿವೆ ಪದಪುಂಜಗಳಲಿ ಕನಸುಗಳ ಕಚಗುಳಿ
ಕುಂದಿದ ಕಸುವಿನಲಿ ಹೇಗೆ ಆಸ್ವಾದಿಸಲಿ ಭಾವಗಳ
ಸಾಫಲ್ಯಗಳ ಸಮ್ಮೋಹನದಲಿ ಸರಸವಿಹುದೇ ಅರ್ಚನಾ
ಸತ್ಯ ಮಿಥ್ಯಗಳ ಶೈಶವದಲಿ ಹೇಗೆ ಸಲಹಲಿ ಭಾವಗಳ
