ಪ್ರಮೀಳಾ ರಾಜ್ ಕವಿತೆ-ಭಾವಯಾನಿಯ ಹಾಡು. - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಪ್ರಮೀಳಾ ರಾಜ್

ಭಾವಯಾನಿ

ನನ್ನತನ ಸ್ವಾಭಿಮಾನ ಯಾವುದೂ
ಹೆಚ್ಚು ಅನಿಸಲಿಲ್ಲ ನನಗೆ
ಬಾಗಿದ್ದು ಸೋತಿದ್ದು ಎಲ್ಲವೂ ಒಲವಿಗಾಗಿ
ಭಾವನೆಗಳಿಗೆ ಕೊಡಲಿಯೇಟು ಬಿದ್ದಾಗಲೂ
ಅಳಬೇಕು ಅನಿಸಲಿಲ್ಲ
ಎಲ್ಲಿ ನಿಮ್ಮನ್ನು ದ್ವೇಷಿಸಿಬಿಡುವೇನೋ ಎಂಬ
ಭಯ ನನಗೆ!!

ಸ್ವಾಭಿಮಾನ….. ಹುಟ್ಟು ಆಸ್ತಿ,,
ಆದರೂ ಬದಿಗಿಟ್ಟುಬಿಡುತ್ತೇನೆ ನನ್ನವರಿಗಾಗಿ
ನಾನು ಪ್ರೀತಿಸುವವರಿಗಾಗಿ…
ಆದರೆ…
ಸ್ನೇಹಕ್ಕಿಂತ ಸ್ವಾಭಿಮಾನವೇ ನಿಮಗೆ ಹೆಚ್ಚು ಅನಿಸುವುದಾದರೆ
ದೂರವೇ ನಿಂತು ಬಿಡುತ್ತೇನೆ
ನಡುವೆ ಒಂದಿಷ್ಟು ಅಂತರವಿಟ್ಟು…!

ಭಾವನೆಗಳು…. ಅಮೂಲ್ಯ
ಒಲವು ಕಾಳಜಿ ಭಾವಯಾನಿಯ ಗುಣ…
ಬಯಸಿದ್ದು ಹಿಡಿ ಪ್ರೀತಿಯಷ್ಟೇ…
ನನ್ನತನವೆಂಬುದು ಒಲವಿಗೆ
ಬೇಲಿ ಹಾಕುವುದಾದರೆ ಮರೆತುಬಿಡಿ…
ಸ್ವಾಭಿಮಾನ ಉಸಿರುಗಟ್ಟಿ ಸಾಯುತ್ತದೆ!!

ಬದುಕು ಪ್ರೀತಿಯ ಹಾಡು…
ದಿನನಿತ್ಯ ಹಾಡಬೇಕು…
ನನ್ನವರಿಗಾಗಿ… ನನ್ನ ಪ್ರೀತಿಸುವವರಿಗಾಗಿ..
ನೆಪ ಮಾತ್ರದ ಒಲವು ನಿಮ್ಮದಾದರೆ
ಮೌನವಾಗಿದ್ದು ಬಿಡಿ…
ನನ್ನೊಳಗೆ ದ್ವೇಷದ ಕಿಡಿ ಹಚ್ಚಬೇಡಿ!!