ಕಾವ್ಯ ಸಂಗಾತಿ
ಈಶ್ವರ ಜಿ ಸಂಪಗಾವಿ.
ಗಜಲ್
ಅಂಬಿಗನಿಲ್ಲದ ಬಾಳ ದೋಣಿಯು ಗೊತ್ತುಗುರಿಯಿಲ್ಲದೆ ಸಾಗುತಿದೆ
ನೆರೆತೊರೆಗಳಿಗೆ ಅಂಜದೆ ಉಬ್ಬರ ಇಳಿತಗಳ ಪರಿಯಿಲ್ಲದೆ ಬಾಗುತಿದೆ
ತನಗರಿಯದ ಅಪರಿಮಿತ ಶಕ್ತಿ ಕರಪಿಡಿದು ನಡೆಸುವುದರ ನಂಬಲಿದೆ
ಗೊಂದಲಗಳ ಗೂಡಿನಲಿ ಗುರಿಗಳಿಗೆ ಇಂಬು ಸರಿಯಿಲ್ಲದೆ ತೂಗುತಿದೆ
ನಿರಾಶೆ ಹತಾಸೆ ಬೆಂಕಿಯಲಿ ಕರಗುವ ಮೇಣದ ಗುಂಡಾಗಿ ಸೊರಗಿದೆ
ಅಸ್ತಿತ್ವ ಅರಸಿ ಮನ ಗುರುವಿನ ಗುರುತರ ಬಾಹುಯಿಲ್ಲದೆ ತೇಗುತಿದೆ
ಹತ್ತು ಹಲವಾರು ಸುತ್ತುವರಿದ ಬಣ್ಣಗಳ ಜಾಲ ಚಿತ್ತ ಚಂಚಲ ಮಾಡಿದೆ
ಏಕತಾನತೆಯ ಏಕಾಗ್ರತೆ ಕೈಗೆಟುಕುವ ಭರವಸೆಯಿಲ್ಲದೆ ಹೋಗುತಿದೆ
ಕಳೆದ ದಿನಗಳ ಕರ್ಮದ ಕೆಸರಲಿ ಹೂತ ಪಾದ ಕೀಳಲು ಹೆಣಗಾಡಿವೆ
ಜನ್ಮ ಸಾರ್ಥಕ ಸಾಧನೆಗೆ ಈಶನ ಕೃಪಾ ಕಟಾಕ್ಷತೆಯಿಲ್ಲದೆ ಮಾಗುತಿದೆ
