ಆಸೀಫಾರವರ ಗಜಲ್

ಕಾವ್ಯ ಸಂಗಾತಿ

ಗಜಲ್

ಆಸಿಫಾ

ತಣ್ಣನೆಯ ಬೆಳದಿಂಗಳಲ್ಲಿ ಚಂದಿರ ವಿಹರಿಸುವಾಗ ನಿನ್ನನ್ನು ಕಾಣುತ್ತೇನೆ
ಹಸಿದ ಹಗಲಿನ ಹೊಟ್ಟೆಗೆ ಮೆಲ್ಲನೆ ರವಿ ಕಾಲಿರಿಸುವಾಗ ನಿನ್ನನ್ನು ಕಾಣುತ್ತೇನೆ

ನೆನ್ನೆಯ ಸಮಯ ಇಂದೇಕೆ ನೆನಪಾಗಿ ಕಾಡುವುದೋ ಕಾಣೇ
ಒಡಲ ತುಂಬಾ ಹೂಗಳು ನಗುತ ಕಂಪು ಪಸರಿಸುವಾಗ ನಿನ್ನನ್ನು ಕಾಣುತ್ತೇನೆ

ಕಳೆದುಹೋದ ದಿನಗಳ ನೆನಪಲ್ಲಿ ಜಗವ ಮರೆತು ಕಳೆದುಹೋಗುತ್ತೇನೆ
ತಂಗಾಳಿ ಮುಂಗುರುಳು ಸವರಿ ಸಾಗುವಾಗ ನಿನ್ನನ್ನು ಕಾಣುತ್ತೇನೆ

ಅನಾಥ ಮನಸಿಗೆ ಸೋತ ಕನಸುಗಳ ಕನವರಿಗಳೇ ಆಸರೆ
ಸಂಜೆಯ ಸೊಬಗು ಬಾನಿಗೆ ಹೊಂಬಣ್ಣ ಚೆಲ್ಲುವಾಗ ನಿನ್ನನ್ನು ಕಾಣುತ್ತೇನೆ

ನಿನ್ನ ಕಾಣುವ ಬಯಕೆ ಇನ್ನೂ ಇದೆ ಮುರಿದ ಹೃದಯದ ತುಣುಕುಗಳಲಿ
ಆಸೀಯ ಆಸೆಗಳು ಮೆಲ್ಲನೆ ರೆಕ್ಕೆ ಬಿಚ್ಚುವಾಗ ನಿನ್ನನ್ನು ಕಾಣುತ್ತೇನೆ

---