ಕಾವ್ಯ ಸಂಗಾತಿ
ಆಸೆ
ಇಮಾಮ್ ಮದ್ಗಾರ್
ಸಾರ್ಥಕ ಬದುಕಿಗೊಬ್ಬ ಸಂಗಾತಿಬೇಕು ಬದುಕು ಮತ್ತಷ್ಟು ಸಾರ್ಥಕವಾಗಿಸಲು
ಹೆಜ್ಜೆಯೊಡನೆ ಹೆಜ್ಜೆಯನಿಟ್ಟು ಜೊತೆ ಜೊತೆಯಲಿ ಸಾಗಲು
ಸಾವಿರೊತ್ತಡಗಳ ನಡುವೆಯೂ
ಎದೆಗಪ್ಪಿ ಸಂಕಟಗಳ ಸಂತೈಸಿ ಪ್ರೀತಿಯಲ್ಲಿಯೇ ಅವಿತಿಡಲು
ಕಣ್ಣುಕಂಡ ಕನಸುಗಳ ನೊಯಿಸದೇ
ಕಣ್ಣು ಕನಸು ಕಾಣಲಾದರೂ ಇಷ್ಟೇ ಇಷ್ಟು ನೆಮ್ಮದಿಯ ನೀಡಲು
ಬರಬಿಸಿಲಿನಲಿ ಬರಸೆಳೆದು ಬಿಗಿದಪ್ಪಿ ಒಲವು ತಣ್ಣಗಿರುವಂತೆ ಕನಸುಗಳ ಕಾಯಿಗೆ ಕಾಪಿಡಲು
ಸಿರಿತನವೇನೂ ಬೇಕಿಲ್ಲೆನಗೆ ಬೆವರ ಹನಿಯಾರದಂತೆ ಶ್ರಮಿಸಿಯಾದರೂ ಭಾವಗಳು ಬೆದರಿ ಹೆದರದಂತೆ ಕಾವಲು ಕಾಯಲು
ಮೆಚ್ಚಿದೊಲವು ಪ್ರೇಮಗೀತೆ ನುಡಿಸಿದಾಗ ಅವನ ಪ್ರೀತಿಯ ಹಾಡಿಗೆ ಎದೆಯಾಳವೂ ಕಂಪಿಸಿ ವಿರಹವನ್ನು ಮಂಜಿನಂತೆ ಕರಗಿ ನೀರಾಗಿಸಲು
ಬದುಕು ಬರಡಾಗದಂತೆ
ಬಯಕೆ ಬಸವಳಿಯದಂತೆ
ಹಗಲಿರುಳೂ ಬೇಸರಿಸದಂತೆ ಮುನಿಸಿಗಳಿಗೂ ಮರೆವಾವರಿಸುವಂತೆ
ಕೇವಲ ನನ್ನೊಡನೆ ಮಾತ್ರ ಪಿಸುಗುಡುವ ಸಂಗಾತಿ ಬೇಕೆನಗೆ ಬದುಕು ಸಾರ್ಥಕವಾಗಲು ಸಂಗಾತಿ ಬೇಕೆನಗೆ
About The Author
