ಕಾವ್ಯ ಸಂಗಾತಿ
ಹದುಳದುಂಬಿ ಸ್ವಾಗತ
ಡಾ.ರೇಣುಕಾತಾಯಿ.ಸಂತಬಾ
ಹೋಗುವೆಯಾ ನೀನು ಇಪ್ಪತ್ತೆರಡು
ಹಳೆ ಕಡತಕ್ಕೆ ಹೊಸತನದ ಜೋಡು
ಎರಡಕ್ಕೆ ಜೋಡಿಯಾದೆ ನೀ ಮೂರು
ಕರೆಯಕ್ಕೆ ಇಪ್ಪತ್ತನೂರಾ ಇಪ್ಪತ್ಮೂರು//
ಹೊತ್ತು ತಾ ನೀ ಕನಸುಗಳ ನೂರು
ಎಳೆಯುತ ಬಾ ನೀ ಸಂಭ್ರಮದ ತೇರು
ಭವ ಬಾಂಧವದೊಳು ತಾ ಸಡಗರ
ಕಟ್ಟು ಕೊರಳಿಗೆಲ್ಲ ಸಾಮರಸ್ಯದ ಸರ//
ತಪ್ಪು ಒಪ್ಪುಭಾವದಲಿ ಬರಲಿ ಲಾಸ್ಯ
ನೋವು ನಲಿವಿನಲಿ ಮೂಡಲಿ ಹಾಸ್ಯ
ನೆರಳ ಬೆಳಕಿನಾಟದಲಿರಲಿ ನವ ವಿನ್ಯಾಸ
ಚಿಗುರಲಿ ಹಳೆಬೇರಿನೊಂದಿಗೆ ಹೊಸ ಸಸ್ಯ//
ಮೌನ ಧ್ಯಾನದಲಿ ಹರಸುತಿರಲಿ
ಮಾನವೀಯ ಮೌಲ್ಯ ಸರತಿಯಲಿ
ಜಗದ ಜೋಳಿಗೆ ತುಂಬಿ ತುಳುಕಲಿ
ಪ್ರೀತಿ ಪ್ರೇಮ ಐಕ್ಯತೆಯ ಸೆಳೆತದಲಿ//
ಡಾ.ರೇಣುಕಾತಾಯಿ. ಸಂತಬಾ ರೇಮಾಸಂ
