ವಿಶಾಲಾ ಆರಾಧ್ಯ -ಗಜ಼ಲ್

ಕಾವ್ಯ ಸಂಗಾತಿ

ವಿಶಾಲಾ ಆರಾಧ್ಯ

ಗಜಲ್

ನಿನ್ನೊಲವ ಈ ಸಂಭಾಷಣೆಯಲ್ಲಿ
ಮನದ ಹಾಳೆಯ ಮೇಲೆ
ಅದೆಷ್ಟು ಅಕ್ಕರಗಳ ಗೀಚಿದವೋ
ನಲಿದು ನಗುವ ಜೋಡಿ ತುಟಿಗಳು

ನಿನ್ನೊಲವ ಈ ಪ್ರೇಮದ ಹರಟೆಯಲಿ
ಹೃದಯದ ಗೋಡೆಯ ಮೇಲೆ
ಅದೆಷ್ಟು ಬೆಳಕ ಚೆಲ್ಲಿದವೋ
ಬೆಳಗಿ ಹೊಳೆವ ಜೋಡಿ ಕಂಗಳು

ನಿನ್ನ ಅಗಲಿಕೆಯ ಗೈರ ಘಳಿಗೆಯಲಿ
ಕಾದ ಒಡಲಿನ ಆಳದಲಿ
ಅದೆಷ್ಟು ತಳಮಳ ಕಳವಳಿಸಿತೋ
ಕಾದು ಕಾದು ಸೋತ ಆ ಕ್ಷಣಗಳು

ನೀ ಬಂದೇ ಬರುವೆಂಬ ಖಾತ್ರಿಯಲಿ
ಜೀವ ಹೂವಾದ ರಾತ್ರಿಯಲ್ಲಿ
ಅದೆಷ್ಟು ಮನ ಕುಣಿದು ಕುಪ್ಪಳಿಸಿತೋ
ನಿನ್ನ ರೂಪ ನೆನೆದ ಆ ನೆನಪೊಳು

ನೀ ಬಂದು ಕರವಿಡಿದ ಒಲವಲಿ
ಹೂವಂತೆ ಮೃದುವಾದ ಸಮಯದಿ
ಅದೆಷ್ಟು ಹಿತವಿತ್ತು ಮಿತವಿತ್ತೋ
ವಿಶುವನಪ್ಪಿ ಬಂಧಿಸಿದ ತೆಕ್ಕೆಯೊಳು

---

ವಿಶಾಲಾ ಆರಾಧ್ಯ