ಕಾವ್ಯ ಸಂಗಾತಿ
ಗುರುವೆಂಬ ದಾಹ
ಶಾಲಿನಿ ರುದ್ರಮುನಿ
ಮನಬಂದಂತೆ ಸುರಿವ ಮಳೆಗೆ ಮನವು ಸಾಗಿರಲು/ಪ/
ನಿನ್ನಾಸರೆಯ ಹಾಡು ಹಾಡುತಿಹೆನು/ಅ ಪ/
ಜೀವ ಕಾನನದ ಚಿಂತೆಗಳ ಸುಳಿಯಲ್ಲಿ
ಕಣ್ಣು ಕಾಣದ ಗಾವಿಲ ನಾನಾಗಿಹೆನು/
ನಿನ್ನ ದರುಶನ ಮಾತ್ರದಿ ದೃಷ್ಟಿಯಲ್ಲಿ
ಸೃಷ್ಟಿಯ ಸೊಬಗ ಕಾಣುತಿಹೆನು//೧//
ಬಾಳ ಕಡಲ ಆಳದಗಲಗದ ಯಾತ್ರೆಯಲ್ಲಿ
ನಿನ್ನೊಂದು ಕರುಣದಲೆಯ ಸೋಕಿಹೆನು/
ದಿಕ್ಕು ತಪ್ಪಿದ ದಡವನು ಹುಡುಕುವಲ್ಲಿ
ಮತ್ತೆ ತಪ್ಪದಂತೆ ನಿನ್ನ ಅರಸುತಿಹೆನು//೨//
ಹಾದಿಯಿದೆ ಮಂಜು ಮುಸುಕಿನ ಎದೆಯಲ್ಲಿ
ಕೊಲ್ಮಿಂಚಿನ ನಿನ್ನಿರುವಲಿ ಕರಗುತಿಹೆನು/
ಅತುಲ ನೋವು ಗತಿಗೆಡಿಸುತಿರುವಲ್ಲಿ
ಶಮನದಲಿ ನಿನ್ನ ಬಳಿ ನಿಂತಿಹೆನು//೩//
ಪ್ರೀತಿ ಕಾಳಜಿ ಸೋತು ಸೊರಗುತಿಹುದಿಲ್ಲಿ
ಉಕ್ಕಿದೆದೆಗೆ ಹರಿಗೋಲು ನೂಕುತಿಹೆನು/
ಚಣದಿ ನಿನ್ನ ಕಾಣುವೆ ಅಂತರಂಗ ಧುನಿಯಲ್ಲಿ
ಮರೆತು ಚಿಂತೆಗಳ ಗೀತೆ ಹಾಡುತಿಹೆನು//೪//
