ಕಾವ್ಯಯಾನ

ಈ ಇರುಳು

ನೂರುಲ್ಲಾ ತ್ಯಾಮಗೊಂಡ್ಲು

ಈ ಇರುಳು ಕಣ್ಣುಗಳಲಿ 
ಸೂರ್ಯ ಉರಿಯುತಿದ್ದಾನೆ 
ಲಕ್ಷ ಲಕ್ಷ ನಕ್ಷತ್ರಗಳು ದನಿ ಕೂಡಿಸಿವೆ
ನವ ಸ್ವಾತಂತ್ರ್ಯದ ಮೊಳಗಿನಲಿ 

ನಮ್ಮ ಯಾತನೆಗಳು ದಿಕ್ಕು ದಿಕ್ಕಿಗೂ ಒಯ್ಯುವ
ಸಮೀರನೇ ನಿನಗೆ ವಂದನೆ
ಅಸಮಾನತೆ ,ಶೋಷಣೆಯಲಿ ನಲುಗಿದೆ
ಈ ಹೊತ್ತು ಈ ದೇಶ
ನಮ್ಮ ಪಾಡಿನ ಕಿಚ್ಚು ಮೂಡಲಿ ಎಲ್ಲೆಡೆ

ಬದುಕು ಶೂನ್ಯವಾಗಿದೆ
ಹೆಪ್ಪುಗಟ್ಟಿದ ರಾತ್ರಿಯಲಿ
ನೋವಿನ ಹಾಡು ಹೊರಡುತಿದೆ
ಇದೊ! ಎದೆ ತಂತಿಯ ನರಳಿಕೆಯಲಿ

ಕಣ್ಣ ಪೊರೆ ಮಂಜಾಗಿದೆ
ನಾಳಿನ ಚಿಂತೆಯಲಿ
ಈ ಸುದೀರ್ಘ ರಾತ್ರಿಯಲಿ 
ಕನಸುಗಳು ತೇಲುತಿವೆ ಉಲ್ಕೆಗಳಾಗಿ 
ತೆರೆದು ಮುಚ್ಚುವ ರೆಪ್ಪೆಗಳಲಿ

************