ಪ್ರೊ.ರಾಜನಂದಾ ಘಾರ್ಗಿಯವರ ಕವಿತೆಗಳು
ಕಾವ್ಯ ಪ್ರಸವ
ಕವಿತೆಗಳೇ ಹೀಗೆ
ಹುಟ್ಟುತ್ತವೆ ಹಾಗೇ
ನಿದ್ದೆಯ ಮಂಪರಿನಲ್ಲಿ
ತೆಲೆದಿಂಬಿನಡಿಯಲ್ಲಿ
ಮುಂಜಾವಿನ ನವಿರಿನಲಿ
ಗೊಧೂಳಿಯ ಕೆಂಪಿನಲಿ
ಬೆಳದಿಂಗಳ ರಾತ್ರಿಯಲಿ
ಬಿಡದೇ ಸುರಿವ ಮಳೆಯಲಿ
ಪ್ರೇಮದ ಉತ್ಖಟತೆಯಲ್ಲಿ
ಹತಾಶೆಯ ಬಿಕ್ಕುಗಳಲ್ಲಿ
ಎಲ್ಲಿಯೋ ಹುಟ್ಟುತ್ತ
ಪ್ರಸವ ವೇದನೆ ನೀಡುತ್ತ
ಹೊರ ಬರಲು ತಿಣುಕುತ್ತವೆ
ನೋಟದಲ್ಲಿ ಹುಟ್ಟಿ
ಭಾವದಲ್ಲಿ ಬೆಳೆಯುತ್ತ
ಶಬ್ದಗಳ ತಡಕಾಟದಲ್ಲಿ
ಮಿಸುಕಾಡುತ್ತವೆ
ಜಾರುತ್ತವೆ ಕೆಲವು
ಬಿಟ್ಟರೆ ಒಡದು ಚೂರು
ಮೆತ್ತಗೇ ಎತ್ತಿಕೊಂಡು
ಒಲೈಸಿ ನೇವರಿಸಿ
ಮಡಿಲಿಗೆತ್ತಿಕೊಂಡಾಗ
ಅರಳುತ್ತ ಬೆಳೆಯುತ್ತ
ಮುಗುಳ್ನಗೆಯೊಂದಿಗೆ
ಮಡಿಲ ತುಂಬುತ್ತವೆ.
—————
ನೀ ಬರುವ ದಾರಿ
ಆರಡಿ ದೇಹದಲ್ಲಿ
ಅಡಗಿದ ನನ್ನಕೂಸು
ತುಂಟಾಟ ಹುಸಿ ಮುನಿಸು
ನೋಟ ಬಲು ಚಂದ
ಪ್ರೀತಿಯಲ್ಲಿ ತೋರುತ
ಸಾಗರದ ಆಳ
ಒಲವ ಸಿಂಪಡಿಸುವ
ನುಡಿ ಮುತ್ತಿನ ಹಾರ
ಜಗವೆಲ್ಲ ಆಳುವ ದೊರೆ
ಕಠಿಣ ಶಿಸ್ತಿನ ತೆರೆ
ಹಿಂದಿರುವ ಮೃದು ಮನ
ಯಾರೂ ಕಾಣದ ಮರೆ
ನೋಟದಲಿ ಪ್ರೀತಿ
ಮಾತಿನಲಿ ಮೋಡಿ
ಹೃದಯವ ತುಂಬಿದ
ಮೋಹಕ ಮಮಕಾರ
ಶೂರ ವೀರ ಸರದಾರ
ಮೌಲ್ಯಗಳ ಹರಿಕಾರ
ನೀ ಬರುವ ದಾರಿಗೆ
ನೆಟ್ಟಿರುವೆ ಕಣ್ಣ ಬಹು ದೂರ
ಜೀವಂತಿಕೆ
ತಂಗಿಯ ಮುಖದಿ
ಅಜ್ಜಿಯ ನಗು ಕಂಡೆ
ತಮ್ಮನ ನಡೆಯಲಿ
ಅಜ್ಜನ ಬೀಸುಗಾಲು
ಅಮ್ಮನ ಮುಗುಳ್ನಗೆ
ಅಜ್ಜಿಯ ಪ್ರತಿರೂಪ
ಅಪ್ಪನ ಗತ್ತಿನಲಿ
ಅಜ್ಜನ ಗತ್ತಿನ ನೆರಳು
ಪ್ರತಿ ಕ್ಷಣ ನೆನಪಿಸುತ
ಅಗಲಿದ ಹಿರಿಯರ
ತವರಿನ ನೆನಪಲಿ
ಅಮ್ಮನ ನೆನೆಯುತ
ಮಗಳ ಹುಬ್ಬಿನಡಿ
ಅಮ್ಮನ ಕಣ್ಣಿನ ಮಿಂಚು
ಮಗನ ವಿಶಾಲ ಬಾಹು
ಅಪ್ಪನ ವಂಶದ ಬಳುವಳಿ
ಎಲ್ಲರೂ ನೆಲೆಸಿಹರು
ನಮ್ಮ ಮನದ ಅಂಗಳದಲ್ಲಿ
ಸಾವು ಬರಿ ಬೌತಿಕ ಪರಿಕಲ್ಪನೆ
ಜೀವಂತಿಕೆ ಕಾಣುವ ಭಾವಗಳಲ್ಲಿ
:ಛಲ
ಪ್ರೀತಿಸ ಬೇಡ ಅತಿಯಾಗಿ
ಹರಿಯುತಿರುವೆ ಶಾಂತವಾಗಿ
ನನ್ನಲ್ಲೆ ನಾನು ಸ್ತಬ್ಧತೆಯಲಿ
ದಡಗಳ ಮೀರದ ಮಿತಿಯಲಿ
ಚಲಿಸುತಿರುವೆ ಹದವಾಗಿ
ಸುತ್ತಿ ಬಳಸದೇ ನೇರವಾಗಿ
ಸುಪ್ತವಾದ ಚೇತನವನ್ನೆಲ್ಲ
ಅಡಗಿಸಿ ತೊಡಗಿಸಿ ಮಡಿಲಲಿ
ಸುತ್ತಲಿನ ಜೀವ ಚೈತನ್ಯ
ನನ್ನ ಪಾಲಿಗೆ ಅನನ್ಯ
ಪೋಷಿಸುತ್ತ ಜೀವ ಕುಲ
ಮರೆತಿರುವೆ ನನ್ನ ನೆಲ
ಸುರಿಸುತ ಪ್ರೀತಿ ವೃಷ್ಟಿ
ಮಾಡದಿರು ಪ್ರಳಯ ಸೃಷ್ಟಿ
ಭಾವಗಳ ಸುರಿಮಳೆಯಲ್ಲಿ
ಕೊಚ್ಚಿಹೊಗಬಹುದು ಎಲ್ಲೆ
ಅಮೀಷಗಳು ನೂರು
ಪಥದಿ ಅಡೆ ತಡೆ ಇನ್ನೂರು
ಸಾಗರವಾಗುವ ಛಲ
ಮನಕೆ ನೀಡಿದೆ ಬೆಂಬಲ
ಪ್ರೊ.ರಾಜನಂದಾ ಘಾರ್ಗಿ
———————
ನಿಮ್ಮ ಮೊದಲ ಕವನ ನನ್ನ ಕಾವ್ಯ ಪ್ರಸವವನ್ನು ನೆನಪಿಸಿತು.
ನೀ ಬರುವ ದಾರಿಯ….ಕಾಯುವಿಕೆಯ ಅಂತರ್ಗತ
ನಿಮ್ಮದೇ ಆದ ಶೈಲಿಯಲ್ಲಿ ಚೆನ್ನಾಗಿ ಮೂಡಿಬಂದಿದೆ.
ತವರುಮನೆಯ ಜೀವಂತಿಕೆಯನ್ನು ಯಾವಾಗಲೂ ಎಲ್ಲ ಹೆಣ್ಣುಮಕ್ಕಳು ಲಾಲಿಸಿ ಪೋಷಿಸುತ್ತಾರೆ. ನನಗೆ ಬಹಳ ಇಷ್ಟವಾಯಿತು.
ಮನಸ್ಸಿನ ಛಲ… ಕವಿತೆಯಾಗಿ ಹರಿದಿದೆ.
ಪ್ರೊ. ರಾಜನಂದಾ ಗಾರ್ಗಿಯವರ ನಾಲ್ಕು ಕವನಗಳು ಸುಂದರವಾದ ಭಾವಾಭಿವ್ಯಕ್ತಿ ಯು ರಚನೆ. ಕವಿಯ ಭಾವದಲಿ ಎಲ್ಲೆಲ್ಲಿಯೊ ಮೊಳಕೆಯೊಡೆದು ಕವಿಯ ಮಡಿಲು ತುಂಬುವ ಕವಿತೆಯೇ ಚೆಂದ . ದಾರಿ ಕಾಯುವ ಮಮತೆಯ ತವಕ ಚೆಂದ.
ವಂಶವಾಹಿಗಳು ಪ್ರವಹಿಸುವ ದಾರಿಯ ತದ್ರೂಪಗಳು ಸಾವನ್ನು ಮೀರಿ ನಿಲ್ಲುವದು, ಸತ್ತವರು ಮತ್ತೆ ಮತ್ತೆ ಜೀವಂತಿಕೆ ಪಡೆದು ನಿಲ್ಲುತ್ತದೆ. ಎಲ್ಲ ಎಲ್ಲೇಗಳ ಮೀರಿ ಸಾಗರವಾಗುವ ಛಲ
ಮನದ ಬಲವಾಗಿಸುವ ಕವಿತೆಗಳು ಸೆಳೆಯುತ್ತವೆ
ಅಭಿಪ್ರಾಯಕ್ಕಾಗಿ ಧನ್ಯವಾದಗಳು ಸುಧಾ ,ಡಾ ನಿರ್ಮಲಾ