ಗಜಲ್
ಸಿದ್ಧರಾಮ ಹೊನ್ಕಲ್
ನನಗೀಗ ಕನಸುಗಳು ಸಾಕು ಅವೆಲ್ಲ ಮಧುರ ನನಸಾಗಬೇಕೀಗ
ನನಗೀಗ ಮಾತು ಸಾಕು ನೀನೆಂದರೆ ನೀನೇ ಜೊತೆಬೇಕೀಗ
ಎಷ್ಟು ದಿನಾಂತ ಬರೀ ನೆನಪಲಿರಬೇಕು ಬಳಲಿವೆ ಎರಡೂ ಜೀವ
ಕೊಂದಾರೆ ಕೊಂದುಬಿಡು ಇಲ್ಲ ಬದುಕಿಸಿಕೋ ನಿನ್ನ ಸಖನಿಗೀಗ
ನಿನ್ನ ಕಣ್ಣಿಗೆ ಹುಚ್ಚನಂತೆ ಕಂಡಿರಬಹುದು ನಾ ನಿನ್ನಾಸೆಗಳ ಬಲ್ಲವನು
ಪ್ರೇಮಿಗಳೆಲ್ಲ ಹುಚ್ಚರಾದರೇ ನಾನಿನ್ನ ಬಹುದೊಡ್ಡ ಹುಚ್ಚನೀಗ
ದೇವದಾಸನಾಗಿಸಬೇಡ ಮಧುಶಾಲೆಗೆ ನನ್ನ ಅಟ್ಟಬೇಡ
ನಿನ್ನ ಮುತ್ತಿನ ಮತ್ತಲಿ ಈ ಜಗವನೇ ಅನುಕ್ಷಣ ಮರೆಯಬೇಕೀಗ
ನಗುವ ನಾಟಕದಲಿ ಮನದ ಆಸೆಗಳನು ನೀ ಹತ್ತಿಕ್ಕಿಸಬೇಡ
ಬಿಕ್ಕುತ್ತಿರುವ ನಿನ್ನದೆಯ ಬಯಕೆಗಳ ಮನಸಾರೆ ತಣಿಸಿಕೋಬೇಕೀಗ
ಮರಳಿಬಾರದು ಈ ಜನ್ಮ ಇರುವಾಗಲೇ ಎಲ್ಲ ತೀರಿಸಬೇಕೀಗ
ಆ ಕಣ್ಣ ಕಾಂತಿಯಲಿ ನಿನ್ನೆದೆಯ ಕೊಳದಲಿ ನಾ ಈಜಬೇಕೀಗ
ಕಾಡಬೇಡ ಕಾಯಿಸಬೇಡ ನಿನ್ನ ಹಂಬಲದಿ ಬೆಂದಿರುವನು ಹೊನ್ನಸಿರಿ
ಹೇಳಲಾರ ಹೇಳದಿರಲಾರ ನಿನ್ನ ಹೊಕ್ಕುಳಲಿ ಹೂ ಅರಳಿಸಬೇಕೀಗ
**********************
