ಕವಿತೆಯ ಜೀವನ

ಕವಿತೆ

ಕವಿತೆಯ ಜೀವನ

ಟಿಪಿ.ಉಮೇಶ್

Bird, Animal, Art, Abstract, Watercolor

ಅಸಹಾಯಕ ಅಕ್ಷರದ ಕಾಲುಗಳ ಊರುತ್ತಾ
ಪೇಲವ ಮುಖ ಚಿಹ್ನೆಗಳ ಹೊತ್ತು ಬಂದವು
ಪ್ರೇಯಸಿಯ ಮನೆಗೆ;
ಭಿಕ್ಷಾಂದೇಹಿ!
ಕೆದರಿದ ಕೂದಲು ಕೆಸರಾದ ಕೈಕಾಲು ಹರಿದ ಬಟ್ಟೆಗಳ ಮುಗ್ಗಲು ನಾರುತ್ತಿರುವ
ಕವಿತೆಗಳ ಕಂಡೊಡನೆ;
ಪ್ರೇಯಸಿ ಅನ್ನ ಹಾಕುವುದಿರಲಿ
ಒಂದು ಹಸನಾದ ಮಾತು
ಹಸನ್ಮುಖ ನಗುವನ್ನು ತೋರದೆ
ದಡಾರನೆ ಕದವಿಕ್ಕಿಗೊಂಡು ಒಳ ಹೋದಳು!
ಮರುದಿನ
ಕವಿತೆ
ಪತ್ರಿಕೆಯಲ್ಲಿ ರಾರಾಜಿಸುತ್ತಿದೆ!!
ಬಹುಖ್ಯಾತಿಗೊಂಡು ಮನೆ ಮನ ಬೀದಿ ಓಣಿಗಳಲ್ಲಿ ಕುಣಿಯುತ್ತಿದೆ!
ಪ್ರೇಯಸಿ ದಾರಿಗಿಳಿದು ಬಂದವಳೇ;
ಕವಿತೆಯ ಬೆನ್ನ ನೇವರಿಸಿದಂತೆ ಮಾಡಿ
ಜುಟ್ಟು ಹಿಡಿದುಕೊಂಡು
ದರದರನೆ ಮನೆಯ ಒಳಗೆ ಎಳೆದೊಯ್ದಳು!

ಬೀದಿಯಲ್ಲಿ ನಿಶ್ಯಬ್ಧ!
ಮನೆಯಲ್ಲಿ ಸಶಬ್ಧ!

ಅವರ ಮನೆ ಕತೆ ನಮಗೆ ನಿಮಗೇಕೆ
ಲೋಕದ ಡೊಂಕು ಕೊಂಕು ತಿದ್ದಲು ನಾನ್ಯಾರು ನೀವ್ಯಾರು?

ಕವಿತೆಗೆ ತನ್ನ ಮನೆ ದಕ್ಕಿತಲ್ಲ;
ಅನುಭವಿಸಲಿ ಬಿಡಿ ಇನ್ನಾದರೂ ಜೀವನ!


One thought on “ಕವಿತೆಯ ಜೀವನ

  1. ಸರ್ ಧನ್ಯವಾದಗಳು
    ಕವಿತೆಯ ಕವಿತೆ ಪ್ರಕಟಣೆ ಹಾಗು ಚಿತ್ರ ಸೊಗಸಾಗಿ ಬಂದಿದೆ.

Leave a Reply

Back To Top