ಗಜಲ್

ಗಜಲ್

ರತ್ನರಾಯಮಲ್ಲ

ಅದೆಷ್ಟು ಚಪಲ ಹೆಣ್ಣಿನ ಬಗ್ಗೆ ಮಾತಾಡಲು
ಅದೆಷ್ಟು ಹಂಬಲ ಹೆಣ್ಣಿನ ಬಗ್ಗೆ ಮಾತಾಡಲು

ಹೆಣ್ಣಿನ ಮನಸನ್ನು ಅರಿಯಲು ಸಮಯವಿಲ್ಲ
ಅದೆಷ್ಟು ಕುತೂಹಲ ಹೆಣ್ಣಿನ ಬಗ್ಗೆ ಮಾತಾಡಲು

ಕಪಟತನ ಕಾವಲಿಗಿದೆ ನಮ್ಮ ಹೃದಯಗಳಿಗೆ
ಅದೆಷ್ಟು ಕಿಲಕಿಲ ಹೆಣ್ಣಿನ ಬಗ್ಗೆ ಮಾತಾಡಲು

ಶಾಂತಿಯ ಮಂತ್ರವು ಕಳೆದ್ಹೋಗಿದೆ ಸಂತೆಯಲ್ಲಿ
ಅದೆಷ್ಟು ತುಮುಲ ಹೆಣ್ಣಿನ ಬಗ್ಗೆ ಮಾತಾಡಲು

ಕಾಪಾಡುವ ಕೈಗಳೇ ಕತ್ತು ಹಿಚುಕುತಿವೆ ‘ಮಲ್ಲಿ’
ಅದೆಷ್ಟು ಗದ್ದಲ ಹೆಣ್ಣಿನ ಬಗ್ಗೆ ಮಾತಾಡಲು

**********************