ಹೇ ರಾಮ್

ಕವಿತೆ

ಹೇ ರಾಮ್

ನೂತನ ದೋಶೆಟ್ಟಿ

ಸುತ್ತ ಕ್ಲಿಕ್ಕಿಸುವ ಕ್ಯಾಮರಾ ಕಣ್ಣುಗಳು
ಚಿತ್ರಪಟದಲ್ಲಿ ಸೆರೆಯಾದದ್ದೇನೋ ಹೌದು

ಇದು ಯಾರ ಸಮಾಧಿ?
ಪ್ರಶ್ನೆಗೆ ಅಪ್ಪನ ಮೆದು ಉತ್ತರ
ಪೋಸು ಕೊಡುವವರ ಪಕ್ಕದಲ್ಲಿ
ಹಿಡಿಯಾದ ನಾನು

ಘೋಡ್ಸೆಯನು ಬಣ್ಣಿಸುವವರ ಮಾತು
ಎದೆ ಹಿಂಡಲಿಲ್ಲ
ಇತಿಹಾಸ ಹೇಳಿತ್ತು ನಿನ್ನೆಗೆ ಮರುಗಬೇಡ

ಗುಂಡಿಗೆ ಎದೆಯೊಡ್ಡಿದವಗೆ
ಕಾವಲು ಬಂದೂಕುಗಳು
ವಿಪರ್ಯಾಸಕ್ಕೂ ಮಿತಿ ಇರಬೇಕು

ತತ್ವಗಳೋ ಹೊದಿಕೆ ಹೊದ್ದ ಪುಸ್ತಕಗಳು
ಬಾಕ್ಸ್ ಆಫೀಸಿನಲ್ಲಿ ಗಾಂಧೀಗಿರಿಯ ಲೂಟಿ
ಖಾದಿಯ ಫ್ಯಾಷನ್ ಮೇಳ
ಸ್ವದೇಶಿ ಬೇಲಿಗೆ ವಿದೇಶಿ ಗೂಟ
ನಾನೊಬ್ಬನೇ ‘ ನಗ್ನ ಫಕೀರ’

**********************************************************