ಹಸಿರು ಗರಿಕೆ ಮೇದು
ಬಿಳಿ ಹಾಲನೀವ ನನ್ನ ಶಿವ

ರಟ್ಟೆ ಮುರಿದು ಬಂದ
ಬೆವರ ಹನಿಯಲಿರುವ ನನ್ನ ಶಿವ

ಮಂದಿರದಿ ನಡೆದು ಮಸೀದಿಯ ಮುಂದಿಂದ
ಇಗರ್ಜಿಯತ್ತ ನಡೆದು ನಗುವ ನನ್ನ ಶಿವ

ಕರಿ ಕಲ್ಲಿನ ಬಿಳಿ ನಗು
ಎಲ್ಲಾ ಬಣ್ಣದ ಕಾಮನಬಿಲ್ಲು ನನ್ನ ಶಿವ

ಗುಡಿಸಲಿಗೂ, ಮಹಡಿಗೂ
ಒಂದೇ ಬಿಸಲನೀವ ಸೂರ್ಯ ನನ್ನ ಶಿವ

ಟಾಕೀಸು, ಶೌಚಾಲಯ, ಪಯಣಗಳಲಿ
ಮಾತ್ರ ಎಲ್ಲರೊಂದಾಗೋ ಜನರಿಂದ ದೂರ ಈ ಶಿವ

ಕಲ್ಲ ಕಪ್ಪೆ, ಬಾನ ಹದ್ದು, ಮಣ್ಣ ಹುಳ
ಮತ್ತು ಮನುಜನ ಹೊಟ್ಟೆಗೆ ತಪ್ಪದೇ ಹಿಟ್ಟಿಡುವ ನನ್ನ ಶಿವ

ಯೇಸುವ ಆಲಂಗಿಸಿ ಮಹಮದನ
ಕೈ ಹಿಡಿದು ಪಳ್ಳಾರ ಹಂಚಿ ತಿನ್ನುವ ನನ್ನ ಶಿವ