ಜಯಂತಿ ಕೆ ವೈ ಕವಿತೆ "ಜಗದ ವ್ಯಾಪಾರ" - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಜಯಂತಿ ಕೆ ವೈ ಕವಿತೆ

“ಜಗದ ವ್ಯಾಪಾರ”

ಬದುಕಿನ ಯಾವುದೋ
ಮೂಲೆಯಲ್ಲಿ ಅಡಗಿದ್ದ ಸಂತಸಕ್ಕೆ
ಹಿಗ್ಗೋ ಹಿಗ್ಗು!
ಯಾರ ಕೈಗೂ ಸಿಗದ ಹಾಗೆ
ಕದ್ದು ಕುಳಿತು ಬೀಗುತಿತ್ತು!
ದುಃಖವೊಂದು ಸುಖವನರಸಿ
ಹಿಂಬಾಲಿಸುತ್ತಿತ್ತು
ನಗುವಿಗೆ ನೋವಿನ ಕಡಿವಾಣವಿತ್ತು
ನಗುವ ಕಿತ್ತುಕೊಂಡ ನೋವಿಗೆ
ಹಬ್ಬದ ಸಂಭ್ರಮ!
ನೋವಿಗೆ ನಗುವಿನ ಬಯಕೆ
ದುಃಖಕೆ ಸುಖದ ಕನಸು
ಬಿಟ್ಟೂ ಬಿಡಲಾಗದ ಸಖ್ಯ!!
ಅವ್ಯಕ್ತ ಭಾವವೊಂದು ಸದಾ
ಕಾಡುವಾಗ ನೆಮ್ಮದಿಗೆಲ್ಲಿ ತಾಣ?
ಅಂತರಂಗದ ವೇದಿಕೆಯಲಿ
ನೊವು-ನಲಿವು, ಸುಖ-ದುಃಖಗಳ
ಭೂತದ ಕೋಲಗಳ ಕುಣಿತ
ನಡುವೆಯೇ ಸಜ್ಜಾಯಿತು
ಜಗದ ವ್ಯಾಪಾರಕೆ
ನಗುವಿನ ಮುಖವಾಡ!