ಕಾವ್ಯ ಸಂಗಾತಿ
ಸರಸ್ವತಿ ಕೆ ನಾಗರಾಜ್
“ನಗುವವನು”
ಮೌನದಲ್ಲೇ ಅನೇಕ
ಯುದ್ಧಗಳನ್ನು ಸೋಲಿಸಿ,
ತನ್ನೊಳಗಿನ ಭರವಸೆಯನ್ನು
ಕಾಪಾಡಿಕೊಂಡು,ವಿಫಲತೆಯ ನೆರಳಲ್ಲೂ
ಬೆಳಕನ್ನು ಹುಡುಕಿ ನಗುವನ್ನೇ
ಆಯುಧವನ್ನಾಗಿಸಿಕೊಂಡವನು.
ಬದುಕು ಎಷ್ಟೇ ಪರೀಕ್ಷಿಸಿದರೂ
ಅವನ ಮನಸ್ಸು ಸೋಲನ್ನು ಒಪ್ಪಲಿಲ್ಲ.
ನಗುವಿನ ಹಿಂದೆ ಇರುವ ಸ್ಥೈರ್ಯವೇ
ಅವನ ಅಸ್ತಿತ್ವದ ನಿಜವಾದ ಶಕ್ತಿ.
ಪರಿಸ್ಥಿತಿಗಳು ಎಷ್ಟೇ
ಬಿರುಗಾಳಿಯಾಗಿ ಬೀಸಿದರೂ
ಅವನು ತನ್ನ ಆತ್ಮದ ದಿಕ್ಕು ತಪ್ಪಿಸಲಿಲ್ಲ.
ಬಿದ್ದ ಜಾಗದಲ್ಲೇ ಪಾಠ ಕಲಿತು
ಮತ್ತೆ ನಿಂತು ನಡೆಯುವ ಧೈರ್ಯ ಅವನದು.
ಅವನ ನಗು ಮೋಸವಲ್ಲ,
ಅದು ಬದುಕಿಗೆ ನೀಡಿದ ಸವಾಲು.
ನೋವನ್ನೇ ನೆಲೆಯಾಗಿ ಮಾಡಿಕೊಂಡು
ಆಸೆಯನ್ನು ಅರಳಿಸಿದ ಕಡಲು ಅವನು.
ಅಲೆಗಳು ಎಷ್ಟೇ ಅಪ್ಪಳಿಸಿದರೂ
ಆಳದಲ್ಲಿ ಶಾಂತಿಯನ್ನು ಕಾಪಾಡುವವನು.
———
ಸರಸ್ವತಿ ಕೆ ನಾಗರಾಜ್
About The Author
