ಕಾವ್ಯ ಸಂಗಾತಿ
ವಾಣಿ ಯಡಹಳ್ಳಿಮಠ
ಗಜಲ್
ನಿನ್ಹೆಸರು ಹೇಳಿ ಈ ಕಂಗಳು ಹೊಳೆದರೇ ನಿನಗರಿವಾಗುವುದೇನು ?
ನಿನ್ಹೆಸರು ಕೇಳಿ ಮನವು ಬೆಳದಿಂಗಳಾದರೇ ನಿನಗರಿವಾಗುವುದೇನು ?
ಸುತ್ತುವರಿದಿರುವೆ ನೀ ,ಈ ಜಗದಜಂಜಾಟಗಳಿಂದ ಗೆಳೆಯ
ಆದರೂ ತುಸು ಮೆಲ್ಲಗೆ ನಾ ನಿನ್ನ ಕರೆದರೇ ನಿನಗರಿವಾಗುವುದೇನು ?
ಹಗಲು ಜವಾಬ್ದಾರಿಗಳ ಮೂಟೆ ಹೊತ್ತುಇರುಳು ಬಳಲಿ ಮಲಗುವುದು ದಿಟ
ಆದರೆ ಕನಸಲಿ ನಿನ್ನ ಕನವರಿಸಿ ಮುದ್ದಿಸಿದರೇ ನಿನಗರಿವಾಗುವುದೇನು ?
ಬದುಕಿನ ಪಯಣದಲಿ ಆಗಾಗ ನಾ ನೊಂದು ನಿರಾಸೆಗೊಳ್ಳುವೆ
ಆಗ ನಿನ್ನೆನಪುಗಳ ನೆರಳನು ಬಾಚಿ ತಬ್ಬಿದರೇ ನಿನಗರಿವಾಗುವುದೇನು ?
‘ವಾಣಿ’ಯ ಪ್ರತಿ ಶಾಯರಿಯಲ್ಲಿಯೂ ನೀ ಉಸಿರಾಡುವೆ ಸಾಕಿ
ನನ್ನ ಲೇಖನಿ ದಿನವೂ ನಿನ್ನ ಪ್ರೀತಿಸಿದರೇ ನಿನಗರಿವಾಗುವುದೇನು ?
ವಾಣಿ ಯಡಹಳ್ಳಿಮಠ
About The Author
