ಉಂಡಿ ಚಕ್ಕುಲಿ ಚೂಡಾ ಮನಿಮನಿಯಾಗ
ಹುಗ್ಗಿ ಹೋಳಿಗೆ ದಿಬ್ಬನದ ಊಟ
ಕೋಡಿಗೆ ರಿಬ್ಬನ್ ಕೊರಳಿಗೆ ಗೆಜ್ಜಿ ಕಟ್ಟಿದ ಹೋರಿ
ಮಾವಿನ ತೊಂಗಿ ಕಟ್ಟಿದ ಚಂದದ ಬಂಡ್ಯಾಗ
ಪರ ಊರಿಂದ ಹುರಪಿಂದ ಬರತಾರ ಜಾತ್ರೆಗೆ
ಜೊತೆ ರೊಟ್ಟಿ ಪಲ್ಲೆ ಮೊಸರನ್ನು ಕಟ್ಟಿ ತರುತಾರ//

ಜಾತ್ರೆಗೆಂದ ಮಲ್ಲಗಂಬ ಹುಗಿತಾರ
ಗರಡಿಮನಿಯಾಗ ಪಳಗಿ ಬರದಾರ
ನೋಡಾಕ ಸುತ್ತ ಜನಜಂಗುಳಿ ನಿಂತಾರ
ಚಪ್ಪಾಳೆ ತಟ್ಟಿ ತಟ್ಟಿ ಹುರಿದುಂಬಿಸಿ
ಗೆದ್ದೋರ್ನ ಹೊತ್ತ ಮೆರೆಸತಾರ //

ಅಗಸ್ಯಾಗ ಹತ್ತಾರ ಅಂಗಡಿ ಹಾಕ್ಯಾರ
ಪೀ ಪೀ ಕೊಳಲು ಜೆಸಿಬಿ ಟ್ರಕ್
ವಿಧವಿಧ ಆಟಿಗೆ ಸಾಮಾನ ತಂದಾರ
ಬಲೂನ್ ಉಬ್ಬಿಸಿ ಇಟ್ಟಾರ
ಕೈ ಹಿಡಿದ ಬಂದ ಮಕ್ಕಳ ಇವನ ನೋಡಿ
ಬೇಡಿ ಬೇಡಿ ಕಾಡಿ ಅತ್ತು ಕರೆದಾಗ
ಎಲ್ಲಾರೂ ಚೌಕಾಸಿ ಮಾಡಿ ಕೊಂಡ ಹೋಗತಾರ //

ಮಠದಾರ ಕಟ್ಟಿ ಮ್ಯಾಲ ಬಳಿಯ ಮಲಾರ
ಬಣ್ಣ ಬಣ್ಣದ ಬಳಿ ಮ್ಯಾಲ ಚಿಕ್ಕಿ ಚಿತ್ತಾರ
ತವರಿಗೆ ಬಂದ ಹೆಣ್ಣು ಮಕ್ಕಳೆಲ್ಲ
ಕೈತುಂಬ ಬಳಿಯ ತೊಟ್ಟ ಹೋಗುತಾರ
ಜಾತ್ರೆಯ ಸಂಭ್ರಮ ತಮ್ಮೂರಾಗು
ಹಾಡಿ ಹಾಡಿ ಹೇಳತಾರ  ತೌರಿಗೆ ಕೀರುತಿ ಬೇಡತಾರ//