ಚಳಿಗಾಲದ ಪದ್ಯೋತ್ಸವ
ಇದು ಚಳಿಗಾಲದ
ವಿಶೇಷ ಕವಿತೆಗಳ ಕಾಲ-
ವ್ಯಾಸ ಜೋಶಿ.
ಚಳಿಗಾಲದ ತನಗಗಳು
ದೀಪಾವಳಿ ಮುಗಿಸಿ
ಶರದ್ ನಿರ್ಗಮನ,
ಚಳಿಯ ಕರಕೊಂಡು
ಹಿಮವಂತ ಬಂದಾನ.
ಹಿಮದಂತೆ ಕೊರೆವ
ಚಳಿಯ ಎಡವಟ್ಟು,
ಗಾಳೀಲಿ ಚುಚ್ಚಿ ನೋಡು ಸಿಕ್ಕಿಕೊಂಡೀತು! ಬೊಟ್ಟು.
ಜೀವ ಹಿಂಡುವ ಥಂಡಿ
ಸುತ್ತಿರುವ ಹೊತ್ತಿಗೆ
ಮುತ್ತಿನ ಮತ್ತಿನಲಿ
ನಲ್ಲ – ನಲ್ಲೆ ಬೆಚ್ಚಗೆ.
ಚಳಿಯೇ ನಡುಗಿದೆ
ಮಂಜಿನಂಥ ಗಾಳಿಗೆ
ದುಂಬಿ ಮಾತ್ರ ಸಾಗಿದೆ
ಮಧು ಸಂಗ್ರಹಣೆಗೆ.
ಜೋಡಿ ಬಯಸುವದು
ಚಳಿ-ಗಾಳಿಯ ಹೂಟ,
ವಿರಾಗಿಯೂ ಆದಾನು
ಮನದಲ್ಲಿ ಲಂಪಟ.
ಕಟಕಟ ಥಂಡೀಲಿ
ಪರಸ್ಪರ ವಿನಂತಿ
ನೀನೇ ಕಂಬಳಿಯಾಗು
ಹೊದ್ದು ಮೈ ಬೆಚ್ಚಗಾಗು.
———————————————-
ವ್ಯಾಸ ಜೋಶಿ.
About The Author
