ಕಾವ್ಯ ಸಂಗಾತಿ
ಶಾರದಾ ಶ್ರಾವಣಸಿಂಗ್ ರಜಪೂತ
ಕನಸುಗಳಿಗೆ ಮುಳ್ಳನ್ನಿಟ್ಟವಳು!
ಯಾರು ಯಾರದೋ ಬಿಡೆಗೆ ಒಳಗಾಗಿ
ಸಿಕ್ಕು ಬದುಕುವವಳು ಅವಳು
ಹೆಣ್ಣಿನಸ್ತತ್ವದ ಅರಿವಿಗೆ ಒಳಗಾಗದೆ
ಅವಳ ಅಸ್ತಿತ್ವಕ್ಕೆ ಕಿಚ್ಚನ್ನಿಟ್ಟವಳು!
ಅವಳೆದೆಯಲಿ ಚಿಗುರುವ ಕನಸುಗಳಿಗೆ
ತ್ಯಾಗದ ಕವಚ ತೊಡಿಸಿ
ಬೋರಲಾಗಿ ನೆನಪಿನ ಹಂದರಕೆ
ಕಣ್ಣೀರಿನ ಆಸರೆ ನೀಡಿದವಳು!
ಸ್ವಂತಿಕೆಯ ಮಾರಿ ತನ್ನ –
ಕನಸುಗಳಿಗೆ ಮುಳ್ಳನ್ನಿಟ್ಟು
ಇತಿಹಾಸದ ಮಹಾನ್
ಮಹಿಳೆಯರ ಪುಸ್ತಕಗಳನ್ನೋದುತ್ತ
ತಲೆದಿಂಬಿನಡಿಯಲ್ಲೇ
ಕನಸುಗಳ ಚಿವುಟಿ, ಬೆಳಗೆದ್ದು
ಯಾರದೋ ಬಿಡೆಗೆ ಹಿಡಿಯಾಗಿ
ಜೀವನ ಸವೆಸುವಳು!
ಬೇಕೆಂದು ಪಟ್ಟು ಹಿಡಿವ
ಗಟ್ಟಿಗಿತ್ತಿ ಸ್ತ್ರೀವಾದಿಯಲ್ಲವಳು!
ಎದೆಯ ಗೂಡಿನಲಿ ಮನೆಮಾಡಿದ
ಬಯಕೆಗಳಿಗೆ ಬಾಗಿಲನಿಕ್ಕಿದವಳು!
ಯಾರದೋ ಬಿಡೆಗೆ ಒಳಗಾಗಿ
ತನ್ನ ಕನಸುಗಳಿಗೆ ಮುಳ್ಳನ್ನಿಟ್ಟವಳು!
ಶಾರದಾ ಶ್ರಾವಣಸಿಂಗ್ ರಜಪೂತ
About The Author
ಸೂಪರ್. ಮೇಡಂ ಜೀ