ಕಾವ್ಯ ಸಂಗಾತಿ

ಡಾ.ವೈ.ಎಂ.ಯಾಕೊಳ್ಳಿ-

ಕನಕ ಸ್ಮರಣೆ

ಬಾಡದ ಮಣ್ಣಿನಲಿ ಮೂಡಿತೊಂದು ಕಿರಣ
ಬೀರಪ್ಪ ಬಚ್ಚಮ್ಮ ದಂಪತಿಗಳ ಅರುಣ
ತಿರುಪತಿ ತಿಮ್ಮಪ್ಪನಿಂದಾಯ್ತು ಕರುಣ
ಕಂದನವ ಮೂಡಿದನು ಮುಂದಾದ ಶರಣ

ಕಲೆ ಶಾಸ್ತ್ರ ಪುರಾಣಕಾವ್ಯಗಳನು‌ ಕಲಿತ
ಶಶ್ತ್ರಾಸ್ತ್ರ ವಿದ್ಯೆಯಲು ಅವನಾದ ಪಾರಂಗತ
ಬಾಡ ಪ್ರಾಂತಕ್ಕ ಅಧಿಪತಿಯವನು ಆದಾತ
ಕನಕನಾಯಕನೆನೆಸಿದನು ಜನರಲ್ಲಿ ಸಂಪ್ರೀತ

ಯುದ್ಧದಲಿ ಅವನಿಗಾಯ್ತೊಮ್ಮೆ ಸೋಲು
ಸಂಸಾರದಲು ಎರಗಿದವು ದುಃಖದ ಸಾಲು
ಕರೆಯಿತು ಕೈಮಾಡಿ ಉಡುಪಿಕೃಷ್ಣನ ಕೊಳಲು
ಹರಿನಾಮ ಸ್ಮರಣೆಯೆ ಅಂದಿನಿಂದವನ ಪಾಲು

ದೊರಕಿತು ಉಡುಪಿಯಲಿ ವ್ಯಾಸರ ಕರುಣೆ
ಸುತ್ತೆಲ್ಲ ಅವನ ಕಾಡಿದರು ಬಿಡಲಿಲ್ಲ ಸಹನೆ
ತೋರಿದನು ಭಕ್ತಿ ಮಾಡಿದಹರಿನಾಮ ಸ್ಮರಣೆ
ಗುರುಗಳು ಹೊಗಳಿದರು ಕನಕರಿಗಿಲ್ಲ ಎಣೆ

ಬರೆದ ನೂರಾರು ಕೀರ್ತನೆ ನಾಲ್ಕು ಕಾವ್ಯಗಳ
ಭಕ್ತಿಯಲಿ ಮಿಂದಿತ್ತು ಸುತ್ತ ಗಣ ಮೇಳ
ಕನಕನಾದನು ಜಗಕೆ ಆರಾಧ್ಯ ದಂಡಿಗೆ ತಾಳ
ತೋರಿದನು ಜಗಕೆಲ್ಲ ಭಕ್ತಿ ಶಕ್ತಿ ಸಂಮೇಳ

ಕನಕನೆಂದರೆ ಬಂಗಾರ ಆದರೂ ಅವನಲ್ಲ ಲೋಹ
ಕುಲದ ನೆಲೆಯನು ಹರಿಯಿರಿ ಎಂದ ಭಕ್ತನವ
ಕಾಗಿನೆಲೆಯ ಕೇಶವನಹೃದಯಕೆ ಹತ್ತಿರವೆ ಇದ್ದವ
ಬಣ್ಣನೆಗೆ ಮೀರಿದ ಸಂತನು ನಮ್ಮನವ ಕಾಯ್ವ

ಡಾ.ವೈ.ಎಂ.ಯಾಕೊಳ್ಳಿ

About The Author

admin

See author's posts