ಕಾವ್ಯ ಸಂಗಾತಿ
ವೇಣು ಜಾಲಿಬೆಂಚಿ
ಗಜಲ್
ನಿನ್ನ ಚೂಪಾದ ತುಟಿಗಳ ಮಧ್ಯೆ ಆ ದುಂಬಿಗೇನು ಕೆಲಸ
ಮಿಂಚಂಥ ಹೂ ದಳಗಳ ಮಧ್ಯೆ ಆ ದುಂಬಿಗೇನು ಕೆಲಸ
ಮತ್ತೆ ಮತ್ತೆ ಸುಳಿವ ಆ ಕಡಲ್ಗಾಲುವೆಯ ಅಲೆ ಮೋಹಕ
ಸುರಿವ ಇಬ್ಬನಿ ಹನಿಗಳ ಮಧ್ಯೆ ಆ ದುಂಬಿಗೇನು ಕೆಲಸ
ಅಂಬರದಂಚನು ದಾಟಿ ನಿಗೂಢವನು ಭೇದಿಸುವ ತವಕ
ಇರುಳು ತಬ್ಬಿದ ತಾರೆಗಳ ಮಧ್ಯೆ ಆ ದುಂಬಿಗೇನು ಕೆಲಸ
ನಯನಾಜೂಕು ನವಿಲ ಸೊಬಗು ನುಣುಪಾದ ಚೆಲುವು
ಕಿಟಕಿಯಂಥ ಕಣ್ಣೆವೆಗಳ ಮಧ್ಯೆ ಆ ದುಂಬಿಗೇನು ಕೆಲಸ
ಜಾಲಿ ಕನಸುಗಳ ಹೊಳೆಯಲಿ ಕಳೆದುಹೋಗುವ ದಿನ
ಲಾಲಿ ಹಾಡುವ ದನಿಗಳ ಮಧ್ಯೆ ಆ ದುಂಬಿಗೇನು ಕೆಲಸ
ವೇಣು ಜಾಲಿಬೆಂಚಿ
About The Author
