ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ
ಗಜಲ್
ಪ್ರೀತಿ ನೆನಪು ಉಕ್ಕುವ ಕಡಲಲಿ ಕೊಚ್ಚಿಹೋಗುವ ಮುನ್ನ ಬಚ್ಚಿಟ್ಟುಕೋ ಗೆಳೆಯಾ
ಮಾತು ಹೊನಲ ಸಾಗರದಲೆಲಿ ತೇಲಿ ಹೋಗುವ ಮುನ್ನ ಒಪ್ಪಿಕೋ ಗೆಳೆಯಾ//
ಹೃದಯದಿ ಪ್ರೀತಿರಾಗವನು ನುಡಿಸಿ ಹಾಡಿದ ವೈನಿಕನು ನೀನಲ್ಲವೇ
ಒಲವ ಮಿಡಿಯದಾ ಹೃದಯತಂತಿ ಹರಿಯೋ ಮುನ್ನ ಕೂಡಿಕೋ ಗೆಳೆಯಾ//
ಜೀವದುಸಿರು ಕೊರಗಿ ಕೊರಗಿ ಕುಗ್ಗಿ ಹೋಗಿದೆಯೋ ನೀನಿಲ್ಲದೆ
ಮನದ ವಿರಹ ಬಿರುಗಾಳಿಯಂತಾಗಿ ಸುಳಿಗೆ ಸಿಗದ ಮುನ್ನ ಅಪ್ಪಿಕೋ ನನ್ನ ಗೆಳೆಯಾ//
ನಿನ್ನನೇ ಕಂಡ ಕನಸುಗಳ ಹೊತ್ತಿಗೆ ತುಂಬಿತುಳುಕುತಿದೆ
ಬಂದು ಓದಿ ಮೈಮನ ತಣಿಸು ತಲ್ಲಣಗಳಲಿ ಜೀವ ಹೋಗುವ ಮುನ್ನ ಸೆಳೆದುಕೋ ಗೆಳೆಯಾ//
ಜನುಮಜನುಮಗಳ ಅತೀ ಮಧುರ ಬಂದವಿದೆಂದು ನಂಬಿರುವೆ
ನಂಬಿಕೆಯ ಪ್ರೇಮ ಸೇತುವೆ ಕಳಚಿ ಬೀಳುವ ಮುನ್ನ ಹಿಡಿದುಕೋ ಗೆಳೆಯಾ//
ಅಂತರಾತ್ಮದ ಭಾವಗಳು ಬಿಸಿಲು ಬುಗ್ಗೆಯಂತೆ ಕುದಿಯುತಿವೆ ಒಳಗೆ
ಹೃದಯದಿ ಕಾಡುತಿಹ ಆಸೆ-ಆಕಾಂಕ್ಷೆಗಳ ಗೋಡೆ ಒಡೆವ ಮುನ್ನ ಸೇರಿಕೋ ಗೆಳೆಯಾ//
ಕಾಣಲು ಸೇರಲು ತವಕಿಸುತಿಹ ಅನುವಿನಂತರಾಳವಿದು ಸೋತಿದೆ
ದೇವರ ನೆನೆದು ಕಾತರಿಸುವ ಜೀವ ಹೋಗುವ ಮುನ್ನ ಉಳಿಸಿಕೊ ಗೆಳೆಯಾ//
ಡಾ ಅನ್ನಪೂರ್ಣ ಹಿರೇಮಠ
About The Author
