ಕಾವ್ಯ ಸಂಗಾತಿ
ವಿಜಯಪ್ರಕಾಶ್ ಸುಳ್ಯ
ಗಜಲ್
ಅಂತರದ ಕಂದಕವದು ಮನದಿ ಮೂಡಿಸಿದ ಭಾವವು ವಿರಹ
ನಟ್ಟಿರುಳಿನಲೂ ನಿದಿರೆಯ ತಡೆಹಿಡಿಯುತಿಹ ನೋವು ವಿರಹ
ತೋಳಿನಾಸರೆ ಬಯಸುತ ಕರಗಿದ ಜೀವಕೆ ಮತ್ತದೇ ಏಕಾಂತ
ಕದಪುಗಳನು ತೋಯಿಸುವ ಕಣ್ಣೀರಿನ ವ್ಯಾಖ್ಯಾನವು ವಿರಹ
ಯೋಗವನು ಹಳಿಯಿತು ಹೃದಯ ಜಾರಿದ ಭಾಗ್ಯವ ನೆನೆದು
ಕದವನು ತೆರೆದಿರಿಸಿ ನಡೆಸುವ ಕಲ್ಪನೆಯ ವಿಹರಣವು ವಿರಹ
ಕಲ್ಮಶವಿಲ್ಲದ ಪ್ರೀತಿಯ ಕನವರಿಕೆಯಲಿ ಕಳೆಯುತಿದೆ ದಿವಸ
ಕರವಿಡಿದು ನಡೆದ ನಿನ್ನೆಗಳ ನೆನೆದು ಅರಳಿದ ನಲಿವು ವಿರಹ
ಕಣ್ಗಳ ಸಮರಂಗದಲಿ ವಿಜಯವನು ಪಡೆದವು ಬಯಕೆಗಳು
ಆಂತರ್ಯದಲಿ ಪಸರಿಸುತಿಹ ಹಿತಸ್ಪರ್ಶದ ಘಮವು ವಿರಹ
ವಿಜಯಪ್ರಕಾಶ್ ಸುಳ್ಯ
About The Author
