ಕಾವ್ಯ ಸಂಗಾತಿ
ಡಾ. ಪುಷ್ಪಾ ಶಲವಡಿಮಠ
ದಾರಿ ಸಲೀಸಾಗಿದೆ
ಈಗೀಗ ದಾರಿ ಸಲೀಸಾಗಿದೆ
ನೀರಾಳವಾಗಿದೆ……
ಅನಿಸುತ್ತಿತ್ತು ಮೊದಮೊದಲು
ಕಲ್ಲುಗಳೇ ತುಂಬಿರುವ ದಾರಿಯಲ್ಲಿ
ನಡೆಯುವುದು ಮುಂದೆ ಸಾಗುವುದು ಹೇಗೆಂದು?!
ದಿನಗಳೆದಂತೆ
ಕಲ್ಲುಗಳ ದಾಟಿ ಹೃದಯಮೀಟಿ
ಎಡವಿ ಬೀಳದಂತೆ
ನಡೆಯುವುದನ್ನು ಕಲಿತಿರುವೆ
ದಾರಿಯೆಲ್ಲ ಸಲೀಸಾಯಿತು
ಕಲ್ಲುಗಳೆಲ್ಲ ಹೂವಾಗಿ ಅರಳಿದವು
ಭಯವಾಗುತ್ತಿತ್ತು
ದಾರಿಮಧ್ಯೆ ಹರವಿಕೊಂಡು
ನಾಲಿಗೆ ಚಾಚಿಕೊಂಡು
ಹೆಜ್ಜೆ ಹೆಜ್ಜೆಗೂ ಚುಚ್ಚಿಕೊಳ್ಳುವ
ಮುಳ್ಳುಕಂಟಿ ಕಂಡಾಗ…..
ದಿಗಿಲಾಗುತ್ತಿತ್ತು
ಹೇಗೆ ನಡೆದು ಹೋಗುವುದೆಂದು?!
ಕಲಿತುಕೊಂಡೆ
ಚಪ್ಪಲಿ ಹಾಕಿಕೊಂಡು ನಡೆಯುವುದನ್ನು
ಅರಿತುಕೊಂಡೆ
ಮುಳ್ಳುಗಳನ್ನೆಲ್ಲ ಸವರಿ ಬದುವಿಗೆ ಸರಿಸುವುದನ್ನು
ಮುಳ್ಳುಗಳೆಲ್ಲ ನಕ್ಷತ್ರವಾಗಿ ನಕ್ಕವು
ದಾರಿಯುದ್ಧಕ್ಕೂ ನೂರಾರು
ಕಂದರಗಳು ದಿಬ್ಬಗಳು
ಏರಿಳಿಯುವುದರಲ್ಲೇ ಬದುಕೇ
ಮುಗಿಯುವುದೆಂದು ತಲ್ಲಣಿಸಿದಾಗ
ಇಡುವ ಸಹಜ ಹೆಜ್ಜೆ
ಗಟ್ಟಿಯಾಗುತ್ತಾ ಸಾಗಿತ್ತು
ಬಯಸಿದ ತಾಣ ಕಣ್ಣೆದುರಿಗೇ ಇತ್ತು
ಮನಸ್ಸು ದೃಢವಾಗಿತ್ತು ಮಾಗಿತ್ತು
ಗಿರಿ ಕಂದರಗಳು ಹೆಮ್ಮೆಯಿಂದ ಬಾಗಿದವು
ನಡೆದು ಬಂದ ದಾರಿಯ
ನಾ ಮರೆಯಲಿಲ್ಲ
ಎಡವಿದ ಕಲ್ಲಿಗೆ
ತುಳಿದ ಮುಳ್ಳಿಗೆ
ಕ್ಷಮೆ ಬೇಡುವೆ
ಅರಿಯದೇ ತುಳಿದಿದ್ದಕ್ಕೆ
ದಾರಿಯಲ್ಲಿ ಕಲ್ಲುಮುಳ್ಳು ಸಹಜ
ಜಾಗ್ರತೆವಹಿಸಬೇಕಿತ್ತು ನಡೆಯುವಾಗ
ಎಚ್ಚರವಿರಬೇಕಿತ್ತು ತುಳಿಯದಂತೆ
ಏರಿಳಿತಗಳ ಮಧ್ಯೆದಲ್ಲಿಯೇ
ಬದುಕ ಕಟ್ಟಬೇಕು ಹಸನಾಗಿಸಬೇಕು
ಈಗೀಗ ಎಲ್ಲವೂ ಅರ್ಥವಾಗಿದೆ
ದಾರಿಯೀಗ ಸಲೀಸಾಗಿದೆ…
About The Author
Leave a Reply