ವಿನುತಾ ಹಂಚಿನಮನಿ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ವ್ಯಾಲಂಟೈನ್ ವಿಶೇಷ

ವಿನುತಾ ಹಂಚಿನಮನಿ

ನಾ ಕಾಯುತಿರುವೆ….

ನೀ ಬರುವೆ ಎಂದು
ಬಾಗಿಲು ತೆರೆದಿಟ್ಟು
ಕಿಟಕಿಯ ಹಿಂದೆ ನಿಂತು
ಗೋಡೆಯ ಗಡಿಯಾರದ
ಕಡೆಗೆ ಒಂದು ಕಣ್ಣಿಟ್ಟು
ನಾ ಕಾಯುತಿರುವೆ

ಬಾಗಿಲ ಮುಂದಿನ ಹಾದಿಯ
ಮೇಲೆ ಇನ್ನೊಂದು ಕಣ್ಣು
ಓಡುವ ಕಾರಿನ ರಭಸದ ಶಬ್ದ
ಚಲಿಸುವ ಗಾಳಿಯ ವೇಗ
ನೀ ಬರುವ ಸುದ್ದಿ ತರುವವೆಂದು
ಕಿವಿಗಳ ತೆರೆದಿಟ್ಟು ನಾ ಕಾಯುತಿರುವೆ

ನಿನ್ನಿಷ್ಟದ ಅಡುಗೆ ಕಾಯುತಿದೆ
ನಿನ್ನ ಉಸಿರಿನ ಗಂಧ ಇಲ್ಲಿದೆ
ಮನೆಯ ಮೂಲೆ ಮೂಲೆಗಳು
ಪ್ರತಿಧ್ವನಿಸಿವೆ ನಿನ್ನ ಮಾತುಗಳ
ಕಾತರದಿ ಕಾಯುತಿದೆ ನೀ ಮೆಟ್ಟಿದಂಗಳ
ನೀ ಬರುವೆಯೆಂದು

ಹೂ ಗಿಡಗಳು ಹಣಿಕಿ ಹಾಕಿ
ಕೇಳುತಿವೆ ನೀ ಬರುವೆಯೆಂದು
ನಿನ್ನ ವಸ್ತ್ರಗಳು ಸಾಲು ಸಾಲಿನಲಿ
ಅರ್ಧ ಓದಿದ ಪುಸ್ತಕ ಪುಟ ತೆರೆದು
ಸ್ಪರ್ಷಕೆ ಕಾದಿರುವ ವಸ್ತುಗಳು
ಕಾಯುತಿವೆ ನೀ ಬರುವೆ ಎಂದು

ಮನದ ಮೂಲೆಯಲಿ
ಆಸೆಯ ದೀಪ ಹಚ್ಚಿಟ್ಟು
ದಿನದಿನವೂ ಸೋಲುವ
ಭರವಸೆಯ ಬಚ್ಚಿಟ್ಟು
ಕಾಡುವ ಪ್ರಶ್ನೆಗಳ
ಚಿಂತೆಗಳ ಮೂಟೆ ಕಟ್ಟಿಟ್ಟು
ನಾ ಕಾಯುತಿರುವೆ
ನೀ ಬರುವೆಯೆಂದು

ಮಿಂಚುವ ನಕ್ಷತ್ರಗಳಲಿ
ನಿನ್ನ ಕಣ್ಣುಗಳ ಹೊಳಪು ಹುಡುಕುವೆ
ಮಂದವಾಗಿ ಬೀಸುವ ಗಾಳಿಯಲಿ
ನಿನ್ನ ಉಸಿರಿನ ಗಂಧ ಅರಿಸುವೆ
ತರಗಲೆಗಳ ಸರಸರ ಸದ್ದನು
ನಿನ್ನ ಹೆಜ್ಜೆಸದ್ದು ಎಂದು ಭ್ರಮಿಸುತ
ಕೇಳಿ ಬರುವ ದನಿ ನಿನ್ನದಾಗಿರಲಿ
ಎಂದು ಇಚ್ಛಿಸುತ ನಾ ಕಾಯುತಿರುವೆ
ನೀ ಬರುವೆಯೆಂದು

ನಾ ಜಗ ಬಿಡುವ ಮೊದಲು
ಕಾಣುವೆನೇ ನಿನ್ನನೊಮ್ಮೆ
ಕಳೆಯದ ಸಮಯದ
ನಿರಾಸೆಯ ಹೂತಿಟ್ಟು
ಚಾತಕ ಪಕ್ಷಿಯಂತೆ
ನಾ ಕಾಯುತಿರುವೆ
ನೀ ಬರುವೆ ಎಂದು

ಹೋಗುವ ಮೊದಲು
ವಿದಾಯ ಹೇಳಲಿಲ್ಲ
ಅರ್ಧ ಶತಮಾನ ಕೂಡಿ ಬಾಳಿ
ಒಂದು ಮಾತು ಹೇಳದೆ ಹೋದೆಯಲ್ಲ
ಅದಕಾಗಿ ನೀ ಬರುವೆ ಎಂದು
ನಾ ಕಾದಿರುವೆ ನಾ ಕಾಯುತಿರುವೆ

ಇನ್ನೆಷ್ಟು ದಿನ ಕಾಯಬೇಕೋ
ಅರ್ಥವಿಲ್ಲದ ದಿನ ಮುಂದೂಡಬೇಕೋ
ನೀನಾದರೂ ಬಾ ಇಲ್ಲವಾದರೆ
ನನ್ನನ್ನಾದರೂ ಕರೆದುಕೊ
ಅಂತ್ಯಗೊಳಿಸು ಅನಂತ ವಿರಹವ
ನಾನಿನ್ನು ಕಾಯಲಾರೆ