ರಮೇಶ ಸಿ ಬನ್ನಿಕೊಪ್ಪ ಹಲಗೇರಿ-ಪಾರ್ಕಿನ ಬೆಂಚುಕಲ್ಲು.. - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಪಾರ್ಕಿನ ಬೆಂಚುಕಲ್ಲು..

ರಮೇಶ ಸಿ ಬನ್ನಿಕೊಪ್ಪ ಹಲಗೇರಿ

ನಿಬಿಡ ಜನಸಂದಣಿಯಾಚೆ
ಬಸ್ ಸ್ಟ್ಯಾಂಡ್ ಎದುರು ದೊಡ್ಡದೊಂದು ಪಾರ್ಕ

ಪಾರ್ಕ ನಿರ್ಮಾಣಕ್ಕಿಂತ ಮುಂಚಿನಿಂದಲೂ
ನಾನು ಇಲ್ಲೆ ಇದ್ದೇನೆ
ಹದವಾಗಿ ನೆಲವನು ಸಮತಟ್ಟು ಮಾಡುವಾಗ ನನ್ನ ಕಿತ್ತು
ಮೂಲೆಗೆಸೆದರೂ
ಅಂದಿನಿಂದಲೂ ಇಲ್ಲೆ ವಾಸ..!!

ಧಾರಾಕಾರವಾಗಿ ಸುರಿವ ಮಳೆಗೆ
ಮೈಮನ ನಡುಗುವ
ಕೊರೆಯುವ ಚಳಿಗೆ
ಮುಖ ಕಪ್ಪಿಡುವ
ಸುರಿವ ಬಿಸಿಲಿಗೆ
ನಾನು ಮೂಕ ಸಾಕ್ಷಿ..!!

ನನ್ನ ಸುತ್ತಲಿರುವ
ಬಗೆ ಬಗೆಯ ಹೂಗಳ ಪರಿಮಳ
ನೆಲ ತಬ್ಬಲಿರುವ
ಬಿದಿರು ಕಣಗಿಲೆ ಬೇವುಗಳ ಹಾಸಿದ ನೆರಳು
ಸಮತಟ್ಟಾದ ಹುಲ್ಲುಗಾವಲಿನಲ್ಲಿ ಮನುಷ್ಯರ ಹೆಜ್ಜೆಗುರುತುಗಳು
ತುದಿಯಂಚಲಿ ಚಾಚಿರುವ ಮುಳ್ಳುಪೊದೆಯ ಸಾಲಿನಲ್ಲೂ ಪಿಸುಮಾತುಗಳು

ಊರಿನಿಂದ ಬಂದು ಇಳಿದವರು
ಸಂತೆಗೆ ಬಂದು ದಣಿದವರು
ಕೂಲಿ ಹಮಾಲಿ ಅಣ್ಣಂದಿರು..
ಶಾಲೆಯ ಮಕ್ಕಳು
ಕಾಲೇಜು ಮುಗಿಸಿ ಬಂದ ಪಡ್ಡೆ ಹುಡುಗರ ದಂಡು
ಸಂಜೆಯಾದೊಡೆ ವಾಕಿಂಗ್ ಮಾಡುವ ಹಿರಿಯರ ಹಿಂಡು
ಎಲ್ಲದಕ್ಕೂ ನಾನು ಸಾಕ್ಷಿಯಾಗಿದ್ದೇನೆ..!!