ಕಾವ್ಯಸಂಗಾತಿ
ಗಜಲ್
ಅನುರಾಧಾ ಶಿವಪ್ರಕಾಶ್
ಅಂಗಳದ ತುಂಬೆಲ್ಲಾ ಹೂವರಳಿ ನಗುತಿದೆ ಬಾರೆಯಾ ಗೆಳೆಯಾ
ತಿಂಗಳಿನ ಬೆಳಕಿನಲಿ ಒಲವ ಬಿಂಬವನು ತೋರೆಯಾ ಗೆಳೆಯಾ
ರಾತ್ರಿ ರಾಣಿಯು ಬಿರಿದು ಕರೆಯುವಳು ಕಂಪ ಸೂಸುತಲಿ
ಪ್ರಕೃತಿ ಪುರುಷನ ಸಮಾಗಮಕೆ ಮುದ್ರೆ ನೀಡೆಯಾ ಗೆಳೆಯಾ
ಮಲ್ಲಿಗೆಯ ಚಿತ್ತಾರ ಮನದ ಮಂಟಪದಿ ನಳನಳಿಸುತಿಹದು
ಕೆಂಪೇರಿದ ಕೆನ್ನೆಯಲಿ ಪ್ರೀತಿಯ ಭಾಷ್ಯ ಕಾಣೆಯಾ ಗೆಳೆಯಾ
ತಾರೆಗಳ ತೋಟದಲಿ ಸುತ್ತಾಡು ಬಾ ಎನಲಾರೆ ನಾನು
ಬಾಳ ದಾರಿಯಲಿ ಪ್ರೇಮ ಕುಸುಮಗಳ ಹಾಸೆಯಾ ಗೆಳೆಯಾ
ಅನು ಬೆಸೆದ ಬಂಧಗಳ ಕಳಚಲಾರಳು ಅರಿಯದೇ ನಿನಗೆ
ತನುವಿನಲಿ ಮಧುರ ಭಾವವ ಹದವಾಗಿಮೀಟೆಯಾ ಗೆಳೆಯಾ
About The Author
ಮನಮುಟ್ಟುವ ಗಜಲ್ ಮೇಡಂ